مکمل ناول :
اڑان ۔۔۔۔۔!!!
تحریر
حناء شاہد
قسط نمبر 3:
مکمل ناول :
اڑان ۔۔۔۔۔۔۔!!!
تحریر
حناء شاہد
قسط نمبر 3:
“سلام! رضیہ بہن۔۔۔۔! کیا حال ہے۔۔۔۔۔۔؟؟؟”
ساتھ والی ہمسائی دالان میں داخل ہوتے ہی پُرمسرت انداز میں چارپائی پر بیٹھتے ہی بولی۔
“خیر ہے۔۔۔۔۔؟ بہت شور آ رہا تھا۔۔۔۔۔۔!!!تمہارے گھر سے، لگتا ہے ابھی احمد آیا تھا۔۔۔۔۔۔!”
اس نے متجسس انداز میں پوچھا۔
“ہاں۔۔۔۔! مگر وہ۔۔۔۔۔۔!!!”
رضیہ جو فاطمہ کی ماں تھی۔پڑوسن کی بات سن کر بولتے بولتے چُپ کر گئیں۔
“کیا آج پھر پیسے مانگنے آیا تھا۔۔۔۔۔۔؟”
ہمسائی نے کرید کر پوچھا۔
“ہاں۔۔۔۔!”
فاطمہ کی ماں نے مختصر سا جواب دیا۔ جس پر ہمسائی عقل و دانش کی دیوتا بن کر اسے بھاشن دینے لگ گئی۔
“رضیہ بہن۔۔۔۔! بُرا مت سمجھنا۔۔۔۔۔ میں تمہارے بھلے کی ہی بات کرنے لگی ہوں۔ خدا نے تمہیں تین بیٹیاں دی ہیں۔۔۔۔۔اگر وہ تمہیں بیٹا بھی دے دیتا تو شاید آج احمد کا یہ حال نہ ہوتا۔ بیٹیاں جتنا بھی پڑھ لکھ جائیں۔۔۔۔۔مگر وہ تو پرایا دھن ہوتی ہیں۔ سہارا تو صرف بیٹے ہی ہوتے ہیں۔۔۔۔۔! سنا ہے احمد نے اب نشہ بھی شروع کر دیا ہے۔ اب بھلا رضیہ سوچنے کی بات یہ ہے کہ نشے کے عادی باپ کی بیٹی سے بھلا کون شادی کرے گا۔؟؟؟”
ہمسائی کی فکرمندی سے زیادہ تماش بینی کا عنصر نمایاں تھا۔ بجائے اس کے کہ وہ رضیہ کی ہمت بڑھاتی وہ اسے مزید احساسِ کمتری کا شکار کر رہی تھی۔ رضیہ نے ایکدم ہی نظر اٹھا کر ہمسائی کی طرف دیکھا اور تاسف سے بولی۔
“نہ بہن! ایسے تو مت کہو۔۔۔۔۔۔! میری بیٹیاں بہت لائق ہیں۔ مجھے یقین ہے ایک دن سب ٹھیک ہو جائے گا۔ فاطمہ کے ابا بھی ٹھیک ہو جائیں گے۔”
زندگی کے شب و روز کے بارے میں کوئی بھی انسان کچھ بھی نہیں کہہ سکتا ہے۔ کب کہاں کیا ہو جائے اس کا اندازہ لگانا اور مستقبل میں ایک اچھی یا بری زندگی کا فیصلہ کرنے کا یا کوئی بھی حتمی رائے قائم کرنے کا اختیار انسان کے پاس نہیں ہے۔ انسان بس امید لگا سکتا ہے اپنے خدا سے اچھے کی دعا کر سکتا ہے۔ یہ سارا اختیار تو خدا کی ذات کو حاصل ہے۔ وہ کب کہاں، کیسے کس وقت کس کی نیت دیکھ کر اسے اس کی محنت کا صلہ دے دے۔ رضیہ کا لہجہ بھی پُرامید تھا۔ اسے یقین تھا کہ اللہ تعالیٰ ایک نہ ایک دن اسے اور اس کی بچیوں کو ان کی محنت اور صبر کا صلہ ضرور دے گا۔
“میری دعائیں تمہارے ساتھ ہیں۔۔۔۔۔۔! مگر یہ بھی یاد رکھنا زمانے والے صرف لڑکیوں کا لائق ہونا ہی نہیں دیکھتے بلکہ آج کے دور میں لوگ خاندان ، نسل ، ذات پات کو زیادہ اہمیت دیتے ہیں۔”
ہمسائی کا انداز طنزیہ تھا۔ رضیہ چپ کی چپ بیٹھی رہی بعض اوقات سب سوالوں کا جواب دینا ضروری نہیں ہوتا ہے۔ کچھ جواب وقت پر دیے جائیں تو صحیح رہتا ہے۔ اس لیے رضیہ بھی ہمسائی کی بات سن کر خاموش ہو گئی۔
“اچھا! ٹھیک ہے۔۔۔۔۔! اب میں چلتی ہوں۔ ہنڈیا چولہے پر رکھ کے آئی تھی۔ سوچا حال ہی پوچھ آؤں جا کے تمہارا۔۔۔۔۔۔”
یہ کہہ کر وہ خاتون تو اٹھ کر چلی گئی مگر رضیہ کا دل برا کر گئی۔ اسے بھی ہمسائی کی باتوں پر کچھ کچھ یقین سا ہونے لگا۔ اور بوہ گہری سوچ میں پڑ گئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رضیہ دالان میں بچھی چارپائی پر بیٹھی کسی گہری سوچ میں گُم تھی۔ جب کسی کام کے سلسلے میں کمرے سے باہر آئی تو ماں کو یوں گہری سوچ میں مبتلا دیکھ کر ماں کے پاس آ کر بیٹھ گئی۔
“امی! کیا ہوا ہے۔۔۔۔۔؟ آپ رو کیوں رہی ہیں۔۔۔۔۔۔۔؟؟؟”
فاطمہ نے فکرمندی سے پوچھا۔ ماں کی آنکھوں سے چھلکتے آنسو دیکھ کر وہ فکرمند ہو گئی تھی۔
“کچھ نہیں۔۔۔۔۔! بس ویسے ہی دل بھر آیا تھا۔”
رضیہ نے اپنے آنسو پونچھتے ہوئے مسکرانے کی کوشش کی۔
“امی! آپ پریشان نہ ہوا کریں۔۔۔۔۔ آپ بس ہم تینوں کے لیے دعا کیا کریں۔ باقی سب اللہ پر چھوڑ دیں۔ اللہ تعالیٰ سب ٹھیک کر دیں گے۔”
اس نے پُرجوش انداز میں ماں کو حوصلہ دیا۔
“فاطمہ ! میری بچی ۔۔۔۔۔۔! اللہ تجھے کامیاب کرے۔۔۔۔۔! تجھے زندگی کی ساری خوشیاں عطا کرے۔ آمین۔۔۔۔۔۔!!!”
رضیہ نے بیٹی کو گلے سے لگا لیا۔ اور ماتھا چومتے ہوئے اسے دعا دینے لگیں۔
“امی! یہ ثمینہ خالہ کیوں آئیں تھیں۔۔۔۔۔۔۔؟؟؟”
اس نے ہمسائی کی آمد کی وجہ پوچھی۔ عموماً محلے میں سے کم کم ہی لوگ ان کے گھر آتے تھے۔ اس لیے وہ ان کی یوں اچانک آمد کی وجہ پوچھ رہی تھی۔ کچھ دیر پہلے اس نے کمرے کی کھڑکی کی اوٹ میں سے ساتھ والی ہمسائی کو اماں کے ساتھ بیٹھے باتیں کرتا دیکھا تھا۔ تو وہ حیرت زدہ تھی۔ اس لیے اچنبھے سے پوچھ رہی تھی۔ جس پر اماں نے تاسف سے ایک سرد آہ بھری۔ ‘مجبور لوگوں کی مجبوریوں کا سب مذاق اڑاتے ہیں۔ وہ بھی یہی فریضہ انجام دینے کے لیے آئی تھی۔ اور طنز کے نشتر چلا کر چلی گئی ہے۔
“امی! کیا مطلب۔۔۔۔۔۔؟ کچھ کہا ہے خالہ نے آپ سے۔۔۔۔۔۔؟؟؟”
فاطمہ کو ماں کے چہرے پر پھیلا تاسف دیکھ کر پریشانی ہوئی تو وہ فکرمند سی ہو گئی تھی اسے لگا ضرور کوئی بات ہوئی ہو گی جو اماں اس قدر پریشان اور ٹوٹے ہوئے لہجے میں بول رہی تھیں۔
“کچھ بھی تو نہیں۔۔۔۔۔ وہی پرانی باتیں۔۔۔۔۔۔! تین بیٹیوں کی ماں ہو، گھر کا خرچ، دیگر اخراجات کیسے چلتے ہوں گے۔۔۔۔اسی لیے تو میں فاطمہ لوگوں سے کم ملتی ہوں۔مجھے لوگوں کے یہ عجیب عجیب سے سوال تنگ کرتے ہیں اور میری ساری زندگی انہی سوالوں میں گزر گئی ہے۔”
رضیہ تاسف بھرے انداز میں سب بیان کر رہی تھیں ۔ ان کے لہجے میں ایک کرب تھا۔ ایک دکھ تھا جس کا اندازہ فاطمہ کو بخوبی ہو رہا تھا۔
“امی ! وہ سب تو ٹھیک ہے مگر قطع تعلق ہو جانا، یہ کس مذہب میں لکھا ہے۔۔۔۔۔؟ لوگوں کے سوالوں کے جواب دینے کی بجائے آپ ان سے چھپ کر بیٹھ جائیں، ان سے تعلق توڑ کر ایک الگ دنیا بسا لیں یہ مسئلے کا حل نہیں ہے۔”
فاطمہ نے مدلل انداز اہنایا تو رضیہ بیٹی کی طرف دیکھنے لگیں۔ انہیں آج محسوس ہوا کہ ان کی چھوٹی سی فاطمہ کس قدر سمجھدار ہو گئی تھی۔
“لیکن بیٹی! یہ زندگی کے تلخ تجربات ہی ہوتے ہیں جو انسان کو قطع تعلق ہونے پر مجبور کر دیتے ہیں۔اکیلی اور مجبور عورت کی مجبوری سے دوسرے لوگ فائدہ اٹھانے کی کوشش کرتے ہیں۔ بیٹیاں تو خدا کی رحمت ہوتی ہیں۔ مگر ہمارے معاشرے میں بیٹیوں کی ماں کے لیے زندگی تنگ کر دی جاتی ہے۔ تمہارے باپ نے تو نشہ شروع کر دیا ہے۔ میں نے اپنی راتیں لوگوں کے کپڑے سلائی کر کے گزاری ہیں ۔ صبح کے وقت لوگوں کے گھروں میں کام کیا ہے۔ دوپہر میں فیکٹری کام کرنے جاتی ہوں۔ ملازمت کرنے والی عورت کو لوگ بہت عجیب نظروں سے دیکھتے ہیں۔”
رضیہ دکھ بھرے انداز میں بول رہی تھی۔ اس کے لہجے میں عجیب درد تھا رنج تھا۔
“امی! ہمارے پیارے رسولﷺ بھی تو بیٹی کے باپ تھے۔ جب وہ اپنی بیٹی، بیوی اور دیگر خواتین کو اتنی عزت دیتے تھے تو پھر ہمار معاشرے کے لوگ بیٹی کو، عورت کو عزت کیوں نہیں دیتے۔۔۔۔۔۔؟”
ثانیہ اور رمشا جو دروازے میں کھڑی تھیں وہ بھی فاطمہ کی بات سن کر ماں کے قریب چارپائی پر آ کر بیٹھ گئیں۔
“باجی! اب وقت بہت بدل گیا ہے۔ عورتیں مردوںکے شانہ بشانہ کام کرتی ہیں۔ تعلیم ، ملازمت غرض کوئی بھی شعبہ ہو۔ عورت کسی سے بھی کم نہیں ہے۔۔۔۔۔۔!”
ثانیہ پُراعتماد انداز میں بولی۔
“لگتا ہے اماں۔۔۔۔۔! ثانیہ بھی بہت سمجھدار ہو گئی ہے۔ یہ اتنی اچھی اچھی باتیں کس نے سکھائیں ہیں تمہیں۔۔۔۔۔۔۔؟؟؟”
فاطمہ نے مسکراتے ہوئے اس سے پوچھا اماں بھی حیران تھیں کہ ان کی بچیاں چھوٹی سی عمر میں اتنی سمجھدار ہو گئی ہیں کہ زمانے کی پرکھ کرنے لگی ہیں۔
“باجی! آپ سے سیکھی ہیں۔۔۔۔۔۔! آپ نے ہی تو بولا تھا بہادر بنو، نڈر بنو، زندگی میں سر اٹھا کر جینا سیکھو۔۔۔۔۔۔”
ثانیہ نے فوراً سے جواب دیا۔
“باجی! خزاں کے بعد بہار کی امید و آس تو انسانوں ، پرندوں غرض ہر جاندار کو ہوتی ہے اور یہ زمانہ تو اپنے ساتھ قدم سے قدم ملا کر چلنے والوں کو ترجیح دیتا ہے۔”
رمشا نے بھی اس سارے تبصرے میں کود پڑنا اپنا فرض العین سمجھا اور مسکراتے مسکراتے عمدہ بات بولی۔
“تم نے بالکل ٹھیک کہا ہے۔ پانی جب تک بہتا رہتا ہے ہردلعزیز اور پسندیدہ ہوتا ہے۔ ٹھہرا ہوا پانی تو جمود کا شکار ہو جاتا ہے۔ اور تم دونوں نے علامہ اقبال کا وہ شعر تو یاد کر لیا ہو گا۔۔۔۔۔۔جو میں نے کل لکھوایا تھا تم دونوں کو۔۔۔۔۔۔؟”
فاطمہ نے قدرے سنجیدگی سے پوچھا۔ تو ثانیہ جھٹ سے بولی۔
“جی باجی! میں سناؤ۔۔۔۔۔؟ میں نے اچھے سے یاد کیا ہے۔”
ثانیہ کے کہنے پر فاطمہ نے اسے فوراً سے سنانے کو کہا۔
“ہاں۔۔۔۔! ہاں۔۔۔۔۔! سناؤ۔۔۔۔۔۔!”
؎ جنبش سے ہے یہ زندگی جہاں کی
یہ رسمِ قدیم ہے یہاں کی
چلنے والے نکل گئے ہیں
جو ٹھہرے ذرا کچل گئے ہیں
سب نے مل کر ایک زوردار قہقہہ لگایا اور ثانیہ نے اپنی محنت اور شوق کی خوب داد وصول کی۔ اس طرح ان چاروں کی زندگی کی ایک شام اپنی ساری تلخ حقیقتوں کے ہمراہ ایک خوبصورت شام بن کراختتام پزیر ہوئی۔
٭٭٭٭٭٭٭٭٭٭٭٭٭٭
(جاری ہے)
