لب سے جو نکلی دعا
از
حناء شاہد
“اگر زندگی میں محبت اور محبت میں اعتبار اور عزت نہ ہو تو محبت کی حیثیت اس پھول کی سی ہوتی ہے ۔ جو خوشبو تو دیتا ہے مگر کانٹوں کا سفر اس قدر گھائل کر دیتا ہے کہ خوشبو اپنی اہمیت کھو دیتی ہے۔ اور ایسی زندگی کی حیثیت اس سوکھے پیڑ کی مانند ہوتی ہے جو زمین کے ساتھ منسلک تو ہوتا ہے لیکن کسی کو بھی چھاؤں نہیں دے سکتا۔”
بیڈ کراؤن کے ساتھ ٹیک لگائے وہ گُم صم بیٹھی تھی۔ اور خلاؤں میں نظر نہ آنے والی شے کو مسلسل گھورے جا رہی تھی۔ قلم اس کی یخ بستہ انگلیوں میں دبے ہوئے ریت کے ٹکڑے کی مانند ٹھنڈا ہو چکا تھا۔ جب بے ساختہ اس کے لبوں سے یہ الفاظ پھسلے۔ سرمئی کانچ جیسی آنکھوں سے دو موتی ٹوٹ کر اس کے گلابی رُخساروں پر پھیل گئے۔
کمرے میں نیم اندھیرا چھایا تھا۔ اسے خود سے وحشت ہونے لگی تو اس نے اپنی پرسنل ڈائری سائیڈ ٹیبل پر رکھی اور کھڑی ہو گئی۔ پھر وہ حیرت سے اِدھر اَدھر دیکھنے لگی۔ اسے اس وقت یوں محسوس ہو رہا تھا کہ کمرے میں موجود ہر شے اس کا مذاق اُڑا رہی ہو۔ اس پر ہنس رہی ہو۔
“مجھے اپنی زندگی میں صرف محبت، اعتبار اور عزت چاہیے۔”
وہ زور سے چلائی۔ اور اس کی آنکھوں سے آنسو برسات کی تیز بارش کی طرح چھلکنے لگے۔
“مجھے یہ دولت، یہ روپیہ پیسہ نہیں چاہیے۔ مجھے تو صرف خالص اور ریاکاری سے پاک محبت چاہیے۔”
اس نے اپنے گلابی رُخساروں سے آنسو پونچھے۔ پھر اس کا دل یکدم ہی گھبرانے لگا تو وہ کمرے سے باہر آگئی اور بےاختیار ہو کر بیرونی دروازے کو پار کر گئی۔ وہ اپنے حواسوں میں نہیں لگ رہی تھی۔ شاید چند لمحے کھلی فضاء میں سانس لینا چاہتی تھی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ ایک طویل سڑک پر چل رہی تھی۔ جس کے دونوں اطراف میں لمبے گھنے سایہ دار درخت لگے ہوئے تھے۔ شام کے ملگجے سائے اب رات میں ڈھل چکے تھے۔ سڑک کافی سنسان تھی۔ اور وہ سڑک پر یوں ہی بےدھیانی سے چل رہی تھی۔ جب یخ بستہ ہوا کے تیز جھونکے نے پُرسکوت ماحول میں ارتعاش پیدا کیا تو اس کے چہرے پر خوف کے باعث ایک جھرجھری اُبھری۔ پتوں کی سائیں سائیں کی آواز پر اس نے مُڑ کر دیکھا تو اندازہ ہوا کہ وہ کافی دور تک نکل آئی ہے۔ پھر اس سنسان سڑک پر ایک برگزیدہ آواز نے اسے مزید چونکا کے رکھ دیا۔
“اللہ کے نام پر کچھ دے دو بیٹی۔۔۔۔۔۔!”
سبز جھولا پہنے وہ بزرگ ٹھنڈی زمین پر بڑے آرام سے بیٹھے تھا۔ اس کی آنکھیں موتیوں کی طرح چمک رہی تھیں اور چہرہ اس قدر جھریوں زدہ تھا کہ دیکھنے والے کو یوں گمان ہو کہ جیسے کسی نے مٹی پر بہت ساری لکیریں کھینچ دی ہوں۔ اس کے لبوں سے پھر وہی صدا بلند ہوئی۔
“اللہ کے نام پر کچھ دے دو بیٹی۔۔۔۔۔۔۔۔!”
عشنا نے گھور کر بزرگ کی طرف دیکھا۔ پہلے تو اسے کچھ سمجھ نہیں آیا پھر وہ دھیمے انداز میں بولی۔
“میرے پاس ایسا کچھ نہیں ہے بابا۔۔۔۔۔! جو میں آپ کو دے سکوں۔”
تھکے تھکے سے لہجے میں بیزاری حد درجہ تھی۔ جس پر بابا نے مسکرا کر کہا۔
“ہر کسی کے پاس سب کچھ نہیں ہوتا بیٹی۔۔۔۔۔! لیکن یہ بھی سچ ہے کہ سب کے پاس کچھ نہ کچھ ضرور ہوتا ہے۔”
بابا کی بات نے اسے چونکا دیا اور وہ حیرت زدہ ہو گئی۔ پھر اپنے ٹوٹے پھوٹے لفظوں کو جوڑ کر سوالیہ نظروں سے بزرگ کی طرف دیکھنے لگی اور پھر چند ثانیے بعد گویا ہوئی۔
“میرے پاس ایسا کچھ نہیں ہے بابا۔۔۔۔۔۔! جو میں آپ کو دے سکوں۔”
وہ اس وقت بیزاری کی انتہاء کو چھو رہی تھی۔ اور مستقل ٹکٹکی باندھے بابا کی طرف دیکھے جا رہی تھی۔جبکہ بزرگ ایک بار پھر عشنا کی بات سن کر مسکرانے لگے۔
“تمہارے پاس ایسا کیا نہیں ہے بیٹی۔۔۔۔۔۔۔! جس کی تلاش میں تم رات کے اس پہر یوں سڑکوں کی خاک چھان رہی ہو۔۔۔۔۔۔۔؟”
بابا نے قدرے سنجیدگی سے پوچھا تو عشنا کی آنکھوں سے آنسو چھلکنے لگےاور وہ بابا کے قریب مگر دو قدم کے فاصلے سے زمین پر بیٹھ گئی پھر چند لمحے اچھا خاصہ رو لینے کے بعد اس نے اپنے آنسو پونچھے اور سر اُٹھا کر ایک نظر بابا کی طرف دیکھا پھر بے ساختہ بولی۔
“بابا۔۔۔۔۔! مجھ سے تو میرا سب کچھ چھن گیا ہے۔ میری سب سے بڑی دولت۔۔۔۔۔۔!”
ابھی وہ اپنی بات مکمل بھی نہ کر پائی تھی کہ بابا استہزائیہ انداز میں مسکرانے لگے اور پھر فورا سے بولے۔
“تم دنیا والوں کے بھی کیا کہنے ہیں۔۔۔۔۔۔۔؟ اب دولت کے بھی درجات رکھ لیے ہیں۔ سب سے بڑی دولت۔۔۔۔۔۔!”
بابا کی بات سن کر اس نے سرخ ڈورے والی آنکھوں کے ساتھ گھور کر بابا کی طرف دیکھا اور غصیلے انداز میں جھٹ سےبولی۔
“کسی بھی انسان کی سب سے بڑی دولت۔۔۔۔۔۔۔! محبت، سکون اور چین کا ہونا ہے۔ لیکن۔۔۔۔۔۔! میری زندگی میں نہ تو محبت ہے اور نہ ہی میرے دل و دماغ میں سکون اور چین ہے۔”
عشنا نے رنجیدہ انداز میں کہا تو دردوغم کے بادل اس کے چہرے سے صاف عیاں ہونے لگے۔
“ہاں! تم نے سچ کہا ہے۔ یہ تو سب سے بڑی دولت ہے جو ہر کسی کو نصیب نہیں ہوتی۔ لیکن وہ مولا ہے، داتا ہے، ہم سب کا پالنے والا ہے۔”
بابا نے ہاتھ اٹھا اس خالق ومالک کی تعریف و توصیف بیان کی ۔ پھر کچھ دیر خاموش رہنے کے بعد بولے۔
“وہ تو کل کائنات کا خالق ہے، مالک ہے، رازق ہے۔ جس کو چاہتا ہے نواز دیتا ہے اور جس کو چاہتا ہے محروم رکھتا ہے۔ ہم تو منگتے ہیں اس کے در کے، صرف منگتے۔۔۔۔۔۔۔!”
بابا نے عاجزی و انکساری سے ربِ کائنات کی تعریف بیان کی جبکہ عشنا وہ تو اپنا سر جھکائے ہر بات پر اثبات میں سر ہلارہی تھی۔ تبھی بابا نے اپنا لرزتا کانپتا ہوا ہاتھ اس کے سر پر رکھتے ہوئے کہا۔
“تم بھی اپنے رب سے مانگو اور اس یقین کے ساتھ مانگو کہ جو تم مانگ رہی ہو وہ تمہیں ضرور دے گا۔ بس لگن سچی ہونی چاہیے بیٹی۔۔۔۔۔۔!”
بابا نے اسے حوصلہ دیتے ہوئے امید کا دیا جلایا۔ جس پر اس نے حیرت سے بابا کی طرف دیکھا اور جھٹ سے بولی۔
” لیکن۔۔۔۔۔۔! میں تو بےحد گناہگار ہوں۔ میں کیسے اپنے رب کا سامنا کروں گی۔۔۔۔۔۔۔۔؟ کیا میرا رب میری ساری خطائیں معاف کر دے گا۔۔۔۔۔۔۔؟”
اس کا انداز سوالیہ تھا اور دل بے حد بے چین اور بے سکون۔
“وہ تو بڑا رحیم و کریم ہے۔ ستر ماؤں سے بھی زیادہ پیار کرتا ہے انسان سے۔ تم سچے دل سے جو بھی مانگو گی۔ وہ تمہیں ضرور دے گا۔”
بابا نے پُریقین انداز کے ساتھ عشنا کو سمجھایا اور اس کے کندھے کو تھپتھپاتے ہوئے گویا ہوئے۔
“اب تم گھر جاؤ بیٹی۔۔۔۔۔۔۔! اور سجدے میں گرگرا کر اپنے رب سے مانگو۔ وہ تمہیں ضرور دے گا۔ وہ سب کو دینے والا ہے۔ وہ تمہیں بھی ضرور دے گا۔”
بابا کے پُریقین انداز نے اس کے دل پر اثر کیا۔ وہ جلدی سے اُٹھی اور تیز تیز قدموں کے ساتھ چلنے لگی۔ بابا کی نظروں نے دور تک جاتے ہوئے اس کا تعاقب کیا۔ بابا کے چہرے پر اطمینان اور سکون کی وہ جھلک دکھائی دے رہی تھی جو شاید دنیا میں کسی کے پاس نہیں ہوتی ۔ چلتے چلتے وہ نجانے کب گھر کے دروازے تک پہنچ گئی اسے اندازہ بھی نہ ہوا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
؎ وہ وقت بھی دیکھے ہیں تاریخ کی گلیوں نے
لمحوں نے خطا کی تھی صدیوں نے سزا پا
متوسط طبقے سے تعلق رکھنے والی عشنا جب ڈولی میں بیٹھی تو اسے یوں محسوس ہوا گویا وہ شہزادی ہو اوراسے بیاہنے کسی سلطنت کا شہزادہ آیا ہو۔ جس شان و شوکت سے اس کی شادی ہوئی۔ سب رشتے دار حیرت زدہ رہ گئے۔ دولت، روپیہ پیسہ، نوکر چاکر ، محل نما گھر سب کچھ مل گیا تھا اسے۔
لیکن۔۔۔۔۔۔! کیا زندگی میں سب کچھ مل جانے سے زندگی مکمل ہو جاتی ہے۔۔۔۔۔۔۔؟؟؟
اس کے سارے خواب پورے ہو گئے تھے۔ اسے ایسا ہمسفر ملا جس کے پاس وہ سب کچھ تھا جو عشنا کو اپنی زندگی میں چاہیے تھا۔ اسے یوں گمان ہو نے لگا جیسے اب کوئی غم، اسے کبھی بھی چھو نہیں سکتا۔ وہ اپنی زندگی بہت عیش و عشرت سے گزار رہی تھی۔ اسے اپنی خوبصورتی اور پُرکشش نقوش اپنی خوش قسمتی معلوم ہوتے تھے۔لیکن پھر کچھ ایسا ہوا جو طمانچے کی طرح اس کے منہ پر لگا اور زندگی کی ساری حقیقت اس کے سامنے کھل گئی۔
“کیسی ہو۔۔۔۔۔۔۔؟؟؟”
نائٹ ڈریس پہنے وہ ٹیرس پر کھڑا تھا۔ اس کا کشادہ ماتھا چاند کی روشنی میں چمک دمک رہا تھا۔ جب اس نے موبائیل فون پر بات کرتے ہوئے سوالیہ انداز میں پوچھا۔
“ٹھیک ہوں۔۔۔۔۔۔۔۔!”
دوسری جانب سے کہا گیا۔ آواز میں بیزاری تھی۔
“سوری۔۔۔۔۔۔۔!!! میں کافی دنوں سے تمہیں وقت نہیں دے سکا۔”
“ہاں ! ہاں۔۔۔۔۔! آج کل نئی نویلی دلہن کے چونچلے اٹھانے میں مشغول ہو گے۔”
وہ غصے سے بولی جیسے طنز کے نشتر چلا رہی ہو۔
“نئی نویلی دلہن۔۔۔۔۔۔۔! مائے فُٹ۔۔۔۔۔۔۔۔۔۔۔۔!!!”
وہ حقارت سے گویا ہوا۔
“یہ تو بس ایک رسمی شادی ہے۔ جسے میں زیادہ دیر تک نبھاؤں گا نہیں۔ جب دل بھر جائے گا تو لباس کی طرح تبدیل کر لوں گا۔”
وہ تفاخر سے خود پر مان کرتے ہوئے استہزائیہ انداز میں مسکرایا۔
“اچھا تو جب مجھ سے دل بھر جائے گا تو کیا مجھے بھی چھوڑ دو گے۔۔۔۔۔۔۔۔؟”
اس کا انداز سوالیہ تھا اور لہجہ بےپروا۔ “نہیں ! تم تو میری جان ہو۔ میں تمہیں کبھی نہیں چھوڑ سکتا۔”
اس نے وضاحت کی۔ جس پر دوسری جانب سے کھل کر ہنسنے کی آواز آئی۔
“اچھا ! تو اپنی جان کے لیے کیا کر سکتے ہو۔۔۔۔۔۔؟”
اس نے سنجیدگی سے پوچھا۔
“میں اپنی جان بھی دے سکتا ہوں۔”
وہ ناز اور لاڈ سے بولا۔
“مجھے تمہاری جان نہیں چاہیے۔”
وہ بیزاری سے گویا ہوئی۔
“پھر کیا چاہیے۔۔۔۔۔۔؟؟؟”
اس نے جھٹ سے پوچھا۔
“میں بہت بور ہو رہی ہوں۔ کہیں باہر چلیں۔۔۔۔۔۔ گھومنے پھرنے، شاپنگ کرنے۔”
اس کا انداز التجائیہ تھا۔ مگر لہجہ پُرجوش تھا۔
“دیکھو۔۔۔۔۔! میں بھی کتنا پاگل ہوں۔۔۔۔؟ تمہیں یہی بتانے کے لیے تو فون کیا تھا۔ میں کل بزنس میٹنگ کے سلسلے میں دبئی جا رہا ہوں۔ تمہاری بھی ٹکٹ کروا دی ہے۔ کل دوپہر کی فلائٹ ہے تیار رہنا۔”
اس نے تفصیل بتائی تو وہ خوشی سے اُچھل پڑی۔
یہ بات تمہیں سب سے پہلے بتانی چاہیے تھی۔”
لیکن پھر بھی اس نے شکوہ کر ڈالا۔
“چلو۔۔۔۔۔! اب تو خوش ہو جاؤ۔”
اس نے گزارش کی۔ پھر کسی کے قدموں کی آہٹ اسے اپنے پیچھے آتی ہوئی محسوس ہوئی۔ اس سے قبل کہ وہ مڑ کر پیچھے کی طرف دیکھتا۔ کسی کے نازنیں ہاتھوں نے سیل فون اس کے ہاتھ سے کھینچا اور زمین پر پٹخ دیا۔
“یہ کیا بدتمیزی ہے۔۔۔۔۔۔۔؟؟؟”
وہ غصے سے چیخا۔
“آپ رات کے اس پہر کس سے باتیں کر رہے ہیں۔۔۔۔۔۔؟”
بلیک نائٹی پہنے عشنا غصے سے عاشر کی طرف دیکھ رہی تھی۔
“اپنی گرل فرینڈ سے۔۔۔۔۔۔۔!”
عاشر کا چہرہ ندامت سے عاری تھا۔ جیسے اسے کسی بھی چیز کی پروا نہ ہو۔
“کیا مطلب۔۔۔۔۔۔؟ گرل فرینڈ۔۔۔۔۔۔۔!!!”
وہ تعجب سے بولی۔ اسے کچھ سمجھ نہیں آ رہا تھا۔
“ہاں ! وہ میری گرل فرینڈ ہے۔”
اس نے بےاعتنائی سے کندھے اُچکا کر کہا۔
“میں عاشر۔۔۔۔۔! آپ کی بیوی ہوں۔۔۔۔۔ میرے ہوتے ہوئے آپ کیسے کسی دوسری عورت کے ساتھ باتیں کر سکتے ہیں۔”
اس کی آنکھوں سے آنسو چھلکنے لگے۔ اور وہ سوالیہ نظروں سے عاشر کی طرف دیکھنے لگی۔
“بیوی ہو تو بیوی بن کر رہو۔ میری ماں بننے کی کوشش نہ کرو۔”
وہ بدلحاظی کا اعلیٰ مظاہرہ کرتے ہوئے ایک بار پھر غصے سے چیخا۔
“اور ویسے بھی مجھے معلوم ہے کہ مجھے کیا کرنا ہے اور کیا نہیں۔۔۔۔۔۔”
وہ بےپروائی سے بول رہا تھا۔ جیسے اسے سب کچھ عشنا پر عیاں ہونے کی فکر ہی نہ ہو۔
“ایک نامحرم عورت کے ساتھ یوں گھومنا پھرنا غلط ہے۔ ہمارا مذہب ہمیں یہ سب کچھ کرنے کی اجازت نہیں دیتا۔ ”
اس نے اپنے آنسو پونچھتے ہوئے عاشر کو سمجھانا چاہا۔ مگر اس کی کوئی بھی دلیل عاشر کے پتھر دل کو موم نہ کر سکی۔ وہ بیوی نام کے اس رشتے کو صرف ایک ذمہ داری نبھانا سمجھتا تھا۔ جو اس کے خیال میں وہ بخوبی نبھا رہا تھا۔
“یہ تم لوگ اپنے ہر کام، ہر بات میں مذہب کو کیوں لے کر آتے ہو۔۔۔۔۔۔؟ میں جانتا ہوں میرے لیے کیا بہتر ہے اور کیا نہیں۔”
وہ بےپروائی سے بول رہا تھا۔ غصے سے اس کے دماغ کی رگیں پھول گئیں۔
“اوہ۔۔۔۔۔ گاڈ۔۔۔۔۔۔! میں کہاں پھنس گیا ہوں۔۔۔۔۔۔؟؟؟”
اپنے دونوں ہاتھ سر پر رکھتے ہوئے وہ ایک بار پھر غصے سے چیخا۔
“میں کچھ دنوں کے لیے عائمہ کو لے کر دبئی جا رہا ہوں۔ میں تمہاری شکل دیکھ دیکھ کر فیڈاپ ہو گیا ہوں۔”
اکتاہٹ اس کے لہجے سے واضح تھی۔
“لیکن۔۔۔۔! میں آپ کو کہیں نہیں جانے دوں گی۔”
عشنا نے عاشر کا بازو پکڑتے ہوئے اسے روکنا چاہا۔ جسے دوسرے ہی لمحے عاشر نے جھٹکتے ہوئے زوردار دھکا دیا اور وہ دور زمین پر جا گری، گویا اسے کسی نے آسمان سے گرایا ہو۔ سچ ہی تھا آج وہ آسمان سے ہی گری تھی۔
“تم ہوتی کون ہو۔۔۔۔؟ مجھے روکنے والی۔۔۔۔۔۔! میں مرد ہوں تمہارا پابند نہیں ہوں۔”
وہ تفاخر سے بولا۔ غصے سے اس کی آنکھیں لال ہو گئیں۔
“میں جب واپس آؤں تو تم مجھے یہاں نظر نہ آنا اور اگر تمہیں میرے ساتھ زندگی گزارنی ہے تو میرے اصولوں کے مطابق رہنا ہو گا۔ ”
“وہ یہ بات کہہ کر رکا نہیں اور فوراً سے کمرے میں چلا گیا۔ عشنا وہ تو حیرت میں مبتلا تھی۔ زمین پر گری ہوئی کوئی بےضرر سی چیز۔۔۔۔۔! جس کے وجود کو عاشر کی باتوں نے انتہاء کا چھلنی کر دیا تھا۔ آج اس پر یہ حقیقت عیاں ہو گئی تھی کہ زندگی میں صرف دولت ہی سب کچھ نہیں ہوتی۔۔۔۔۔۔!
عورت کے لیے سب سے اہم چیز شوہر کی محبت، گھر کا سکون اور آرام ہے۔ دولت تو ثانوی حیثیت رکھتی ہے۔ وہ تو جیسے بُت بنی بیٹھی تھی۔ زندگی نے ایسا طمانچہ اس کے منہ پر مارا تھا۔ جس نے اسے خوابوں کی دنیا سے نکال کر حقیقت کی زمین پر پٹخ دیا تھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
؎ کر نہ آنکھوں کا یقین دنیا کی صورت اور ہے
زندگی کے ذرے ذرے کی حقیقت اور ہے
دبئی کی رنگینیوں اور پُررونق ماحول میں انسان گم سا ہو کر رہ جاتا ہے۔ آنکھوں کو وا کرنے والی روشنیاں ایک لمحے کے لیے اسے ستاروں کا گماں دیتی ہیں۔ اس خوبصورت شہر کا ہر کونہ حددرجہ خوبصورت اور زندگی سے بھرپور تھا۔ عائمہ اور عاشر بھی اس خوبصورت شہر کے عین وسط میں بنے سٹریٹ کارنر میں بیٹھے تھے۔ بلیک کافی کے مزے لیتے ہوئے عاشر کے منہ سے نکلی ہوئی بات نے عائمہ کو یکدم ہی چونکا دیا اور وہ حیرت زدہ ہو گئی۔
“میں تم سے شادی کرنا چاہتا ہوں۔”
عاشر کا انداز انتہائی سنجیدہ تھا۔ اور چہرے پر نیم مسکراہٹ۔۔۔۔۔! لیکن دوسری جانب بیٹھی عائمہ کے تو ہوش اُڑ گئے تھے۔ پہلے تو اسے کچھ سمجھ نہ آیا پھر کچھ لمحے خاموش رہنے کے بعد وہ پُراعتماد انداز میں بولی۔
“کیا مطلب ہے اس بات کا۔۔۔۔۔۔؟”
اس کا انداز استفہامیہ تھا اور لہجے میں حددرجہ بےاعتنائی تھی۔ جبکہ عائمہ کے سوال نے اس بار اسے حیرت میں مبتلا کر دیا تھا۔
“میں نے ایسی بھی کوئی مشکل بات نہیں کی۔”
کافی کا گرم گرم کپ میز پر رکھتے ہوئے وہ حیرت سے گویا ہوا۔
“ہاں! لیکن۔۔۔۔۔! شاید۔۔۔۔۔! یہ میرے لیے بہت مشکل کام ہے اور ایسی ہی مشکل بات ہے جو مجھ جیسی کسی بھی لڑکی کی سمجھ میں کبھی نہیں آ سکتی۔”
عائمہ نے اپنے بھورے بالوں کو نرم و ملائم ہاتھوں سے شولڈر کے پیچھے کرتے ہوئے انتہائی سنجیدگی سے کہا۔
“میں نے تو ایک سمپل سی بات کی ہے۔ کہ اب ہمیں شادی کر لینی چاہیے۔”
عاشر کے ماتھے پر چند شکنیں نمایاں ہوئیں۔ لیکن عائمہ وہ تو بےپروائی کی انتہاء کو چھو رہی تھی۔
“شادی۔۔۔۔۔!!!”
اس نے اورنج جوس کا ایک سِپ لیتے ہوئے استہزائیہ انداز میں کہا۔ عاشر کو یوں محسوس ہوا جیسے عائمہ اس کا تمسخر اڑا رہی ہو۔
“شادی کی بات پر تمہارا اتنا غیرسنجیدہ رویہ مجھے سمجھ نہیں آ رہا۔”
عاشر نے اپنے غصے پر قدرے قابو پاتے ہوئے آہستگی سے کہا۔
“شادی۔۔۔۔۔! اور مجھ سے۔۔۔۔۔۔۔۔۔۔۔۔۔؟؟؟”
اس کا انداز تمسخرانہ تھا – جس نے عاشر کو مزید حیرت زدہ کر دیا۔
“میں تم سے محبت کرتا ہوں اور تم بھی یقیناً مجھ سے محبت کرتی ہو۔ مجھے لگتا ہے اب ہمیں شادی کر لینی چاہیے۔ یقیناً ہم ایک خوشگوار زندگی گزاریں گے۔”
عاشر نے وضاحت دیتے ہوئے ایک اچھی زندگی کا خواب بُنا تھا۔ اور اسے یقین دلانے کی کوشش کرتے ہوئے پُراعتماد لہجے میں بولا تھا۔ جس پر عائمہ نے ایک زوردار قہقہہ لگایا اور نہایت نخوت سے بولی۔
“مسٹر عاشر۔۔۔۔۔۔! ہم جیسی لڑکیاں صرف افئیر کرنے کے لیے، گھومنے پھرنے کے لیے اور چِل کرنے کے لیے ہوتی ہیں۔ یہ شادی کرنا ، ریلیشن نبھانا اور تم جیسے مردوں کو برداشت کرنا ہمارے بس میں نہیں ہے۔”
عائمہ کے چہرے پر ایک تمسخرانہ ہنسی تھی۔ جس نے عاشر کو مزید حیرت زدہ کر دیا تھا۔ وہ بوکھلاہٹ کا شکار ہو گیا تھا۔ پہلے تو اسے کچھ سمجھ نہ آیا۔ پھر اس نے اپنے ماتھے پر آئے پانی کے ان قطروں کو ہاتھ سے صاف کرتے ہوئے میز پر رکھے ہوئے پانی کے گلاس کو تھاما اور ایک گھونٹ پانی پی کر واپس گلاس میز پر رکھتے ہوئے اس نے عائمہ کی طرف دیکھا جو انتہائی غور سے اس کی طرف ہی دیکھ رہی تھی۔ پھر عاشر نے نہایت تحمل برتتے ہوئے بات شروع کی۔
“کیا مطلب ہے تمہاری بات کا۔۔۔۔۔۔؟ تم کہنا کیا چاہتی ہو۔۔۔۔۔۔؟؟؟”
عاشر کے چہرے پر سنجیدگی کے تاثرات واضح دکھائی دے رہے تھے۔
“مطلب صاف ہے میں تم سے شادی نہیں کر سکتی۔ بلکہ میں تو کسی کے ساتھ بھی شادی نہیں کر سکتی۔”
عائمہ نے جھٹ سے جواب دیا۔ پھر کچھ لمحے خاموش رہنے کے بعد گویا ہوئی۔ جبکہ عاشر وہ تو اس کے اس انداز کو دیکھ کر خاموش بُت بنا بیٹھا تھا۔ اور عائمہ کی جانب ٹکٹکی باندھے دیکھے جا رہا تھا۔
“گھومنا پھرنا، مزہ کرنا، تم جیسے مردوں کے لیے تفریح کا سامان کرنا، گفٹ لینا اور عیش کرنا بس یہی ہماری زندگی ہے۔ آج تم ہو، کل کوئی اور۔۔۔۔۔۔! اور اس کے بعد کوئی اور ہو گا۔۔۔۔۔۔! بس یہی ہے میری اور میرے ساتھ رہنے والی ہر لڑکی کی زندگی۔۔۔۔۔۔!” عائمہ جس بہادری کے ساتھ اپنی حقیقت بیان کر رہی تھی۔ بغیر کسی ڈر اور خوف کے۔۔۔۔۔ وہیں عاشر کو خود بھی معلوم نہیں تھا کہ اس میں اس قدر برداشت کہاں سے آ گئی ہے۔ جو وہ خاموشی سے عائمہ کی ساری سفاکانہ باتیں سن رہا تھا۔
“تم جیسے مردوں کو عشنا جیسی بیویاں ہی برداشت کر سکتی ہیں۔ بڑا ظرف ہے تمہاری بیوی کا۔۔۔۔۔ میں تو حیران ہوں۔۔۔۔۔۔ داد دینی چاہیے تمہاری بیوی کو۔۔۔۔۔۔!”
استہزائیہ انداز نے عاشر کے دل و دماغ کو جھلسا کر رکھ دیا۔
“میں ایک مشورہ دوں۔۔۔۔۔۔۔۔! اپنی بیوی کے پاس واپس چلے جاؤ۔ وہ ایک مشرقی عورت ہے اور مجھے یقین ہے ہر مشرقی عورت کی طرح وہ ضرور تمہیں معاف کر دے گی۔ ویسے بھی تمہاری بیوی جیسی عورتوں کی خصلت ہوتی ہے ان کا مرد باہر جس مرضی تھالی میں چھید کیوں نہ کر آئے۔ انہیں مان ہوتا ہے کہ ان کا شوہر لوٹ کر واپس ان کے پاس ہی آئے گا۔لہذا تم بھی اپنی بیوی کے پاس واپس چلے جاؤ۔”
عائمہ اپنی باتوں سے طنز کے وہ نشترچلا رہی تھی جو سیدھے عاشر کے دل کو چھلنی کر رہے تھے۔لیکن عائمہ اپنی طنزیہ باتوں سے عاشر کو حقیقت کے آئینے کے سامنے کھڑا کر کے اپنا گدلہ چہرہ دیکھنے پر آمادہ بھی کر رہی تھی۔
“اپنی بکواس بند کرو۔۔۔۔۔۔! اور میری پاکدامن بیوی کا نام اپنی گندی زبان سے مت لینا۔”
وہ اردگرد بیٹھے لوگوں کی پروا کیے بغیر غصے سے چیخا۔ اپنی خاموشی کے اس قفل کو توڑ کر جو درحقیقت محبت کا قفل تھا۔ عائمہ کی خودساختہ محبت کا قُفل۔۔۔۔۔۔! چند ہی سیکنڈز میں نفرت کے ہتھوڑے نے اس پر ایسی کاری ضرب لگائی کہ وہ ٹوٹ کر شیشے کی طرح کرچیوں میں بکھر گیا۔
“چلاؤ مت۔۔۔۔۔۔۔!”
عائمہ نے گُھور کر عاشر کی طرف دیکھا۔ اور گرجدار آواز میں چیخی۔ اردگرد بیٹھے لوگ ان دونوں کی طرف دیکھ کر چہ مگوئیاں کرنے لگے۔
“اپنا اور میرا تماشا بنانے کی کوشش نہ کرو۔”
وہ اپنے غصے پر قابو پاتے ہوئے نہایت تحمل سے بولا۔
“اچھا ٹھیک ہے۔۔۔۔۔۔! اگر تم چاہتے ہو کہ میں خاموشی سے تماری زندگی سے اور یہاں سے چلی جاؤں تو میری ایک شرط ہے۔”
عائمہ نے آہستگی سے ٹیبل پر اپنی دونوں کہنیاں محتاط انداز میں رکھتے ہوئے کہا۔
“شرط۔۔۔۔۔۔؟؟؟”
عاشر نے اچنبھے سے پوچھا۔
“ہاں۔۔۔۔۔! شرط ۔۔۔۔۔۔۔! تم میرے پاکستان واپس جانے کے سارے انتظامات کروا دو۔ میں خاموشی سے یہاں سے چلی جاؤں گی۔”
عائمہ نے سنجیدہ انداز میں اپنا مدعا بیان کیا۔
“ٹھیک ہے۔۔۔۔۔۔! تم ہوٹل جاؤ۔۔۔۔۔ ایک ڈیڑھ گھنٹے تک سارے انتظامات ہو جائیں گے۔ اب میں بھی تم سے کوئی تعلق نہیں رکھنا چاہتا۔”
عاشر نے اثبات میں سر ہلاتے ہوئے حامی بھر لی۔ اس وقت وہ اپنے غصے پر جس ضبط سے قابو رکھے ہوئے بیٹھا تھا یہ صرف وہی جانتا تھا۔ محبت کے نام پر دھوکہ کھانا اور پھر اس زخم کو خاموشی سے سہہ جانا اور چھپا لینا بڑے ہی ضبط کا کام ہے۔
“گُڈ۔۔۔۔! مجھے تم سے اسی عقلمندی کی توقع تھی۔”
عائمہ نے مسکرا کر کہا۔
“ایک آخری بات۔۔۔۔۔۔۔!”
وہ سنجیدگی سے بولی۔
“تم جیسے امیرزادے محبت کے لیے مجھ جیسی لڑکیاں ڈھونڈتے ہیں۔ بہتر تو یہ ہے کہ باہر ڈھونڈنے کی بجائے اپنے گھر میں موجود اس عورت سے محبت کرو جو تمہاری ساری غلطیوں کو معاف کر کے ہمیشہ تمہاری منتظر رہتی ہے۔ وہ ہمارے مقابلے میں کم خوبصورت ضرور ہوتی ہوں گی مگر عاشر صاحب یقین جانیے ان کا کردار ہم سے کئی درجے بہتر اور پاک ہو گا۔ مجھ جیسی لڑکیوں کا کیا ہے ہم تو صرف دولت کی پجاری ہیں۔ جہاں دام زیادہ لگ گئے وہیں نیلام ہو گئیں۔ ہمارا اُٹھنا، بیٹھنا ، کھانا پینا، سونا سب دولت کے ساتھ ہے۔ حتیٰ کہ ہماری تو سوچ بھی دولت سے شروع ہو کر دولت پر ہی ختم ہوتی ہے۔”
وہ اپنے اس سفاکانہ چہرے پر نادم تھی۔ پھر وہ نظریں چُراتے ہوئے کرسی سے اُٹھ کر کھڑی ہو گئی۔ اور فورا سے بولی۔
“اب میں چلتی ہوں ۔ہو سکے تو مجھے معاف کر دینا۔”
اس نے اپنا ہینڈ بیگ اُٹھایا۔ موبائیل فون ہاتھ میں پکڑا اور دھیرے دھیرے چلتے ہوئے وہاں موجود لوگوں کے ہجوم میں گم ہو گئی۔ عاشر کی نظروں نے دور تک جاتے ہوئے اس کا تعاقب کیا۔ زندگی نے ایک طمانچہ آج اس کے منہ پر بھی مارا تھا۔ عائمہ کی ہر بات اس کے دل کو چھلنی کر رہی تھی۔ وہ ندامت کے سمندر میں غوطہ زن تھا۔ پچھتاوے کی آگ اس کے بدن کو جھلسا رہی تھی۔ پھر اچانک اس کے دل و دماغ میں ایک معصوم سا چہرہ اُبھرا۔ کانچ جیسی سُرمئی آنکھوں کے خیال نے اس کے اندر اَضطراب برپا کر دیا اور یکدم ہی وہ بول اُٹھا۔
“عشنا۔۔۔۔! یہ مجھ سے کیا ہو گیا۔۔۔۔۔۔؟؟؟”
وہ اپنے رویے پر نادم تھا۔
“مجھے جلدازجلد پاکستان جانا ہو گا۔”
عاشر نے فوراً سے فیصلہ کیا اور اس فیصلے پر عمل کرتے ہوئے اس نے فوراً سے وائلٹ نکالا اور کچھ پیسے ٹیبل پر رکھتے ہوئے وہاں سے چلا گیا۔ اس کے اندر برپا ہونے والا اضطراب اس کے چہرے سے بھی عیاں ہو رہا تھا۔ وہ جلدازجلد واپس جانا چاہتا تھا۔ تاکہ عشنا سے معافی مانگ سکے۔
—————————————-
؎ دنیا کی ٹھوکروں سے ایک ہی سبق سیکھا ہے اقبال
تمام مشکلوں کا حل ایک سجدہۤ خدا میں پوشیدہ ہے
جب وہ گھر واپس آئی تو اس کے کپڑے شکن آلود ہو چکے تھے۔ اس نے فوراً سے غسل کیا اور وضو کر کے جائے نماز بچھا کر نیت باندھی ۔ پہلے تو اسے کچھ سمجھ نہ آیا۔ پھر جب دعا کے لیے ہاتھ اُٹھائےتو کچھ بولا بھی نہ گیا۔ پھر سجدے میں گِرگِرا کر ربِ کائنات سے اپنے تمام گناہوں کی معافی مانگی اور بعد میں اپنے شوہر، اپنے محبوب عاشر کے واپس پلٹنے اور اور سیدھی راہ پر چلنے کی دعا کی۔ پچھلے کچھ دنوں سے عشنا کا یہی معمول تھا۔ وہ ہر نماز میں روروکر اللہ سے اپنے گناہوں کی معافی مانگتی اور عاشر کے صحیح سلامت گھر واپس آ جانے کی دعا کرتی رہتی۔ آج بھی وہ جائے نماز بچھائے رورو کر سسکیاں بھربھر کر سجدے میں سر جھکائے بیٹھی تھی۔ جب وہ تھکے ہارے ندامت کے بوجھ سے بھاری قدموں کے ساتھ کمرے میں داخل ہوا تو اسے یوں سجدہ ریز دیکھ کر عاشر کی آنکھوں میں آنسو میں اُمڈ آئے۔ جن پر ضبط رکھتے ہوئے اس نے ان آنسوؤں کو اپنی آنکھوں میں ہی دبا کر رکھا اور عشنا کا نام بےساختہ پکارا۔
“عشنا۔۔۔۔۔۔!!!”
وہ وہیں عشنا کے قریب گھٹنوں کے بل بیٹھ گیا اور اس کے لرزتے کانپتے وجود کو اپنے آہنی بازوؤں کے حصار میں سمیٹنے کی کوشش کی۔ عاشر کی آواز سن کر وہ چونک گئی۔ اور یکدم ہی اپنا سر اُٹھا کر عاشر کی طرف دیکھا۔
“آ۔۔۔۔آ۔۔۔۔۔آپ۔۔۔۔۔۔!!! واپس آ گئے۔۔۔۔۔۔؟”
عاشر کو یوں اپنے سامنے دیکھ کر وہ بوکھلاہٹ کا شکار ہو گئی۔ اس نے فوراً سے اپنے آنسو پونچھے اور مسکراتے ہوئے عاشر کے بالکل سامنے بیٹھ گئی۔
“مجھے معاف کر دو عشنا۔۔۔۔۔۔۔۔! میں نے تمہارے ساتھ بہت زیادتی کی ہے۔”
ندامت سے اپنے سر کو جھکاتے ہوئے عاشر نے ہاتھ جوڑ کر عشنا سے معافی مانگی تو اس نے فوراً سے اپنے نازنیں ہاتھوں سے اس کے جوڑے ہوئے آہنی ہاتھوں کو تھام لیا۔ اور جھٹ سے بولی۔
“یہ اللہ تعالیٰ کی طرف سے ہم دونوں پر آزمائش تھی۔ ہمیں تو خدا کا شکر ادا کرنا چاہیے۔ اس نے ہمیں بہت بڑے نقصان سے بچا لیا ہے۔”
وہ مسکراتے ہوئے بولی تو اس کی سُرمئی آنکھیں موتیوں کی طرح چمکنے لگیں۔
“کیا تم نے مجھے معاف کر دیا ہے۔۔۔۔۔۔۔؟؟؟”
اس کا انداز سوالیہ تھا اور لہجہ تعجب آمیز۔
“مجھے چھوڑ کر تو نہیں جاؤ گی۔۔۔۔۔۔۔۔؟”
وہ اس وقت ندامت، خوف اور بےیقینی کی کیفیت میں مبتلا تھا۔
“جس سے محبت کی جاتی ہے اسے چھوڑا نہیں جاتا۔”
وہ مسکراتے ہوئے بولی۔
“اللہ تعالیٰ بھی تو ہم سے بےپناہ محبت کرتے ہیں تو کیا وہ ہماری چھوٹی بڑی غلطیوں اور کوتاہیوں پر ہمیں چھوڑ دیتے ہیں۔۔۔۔۔۔۔؟ نہیں۔۔۔۔۔۔! بالکل اسی طرح میں بھی آپ سے بےپناہ محبت کرتی ہوں۔ میں کبھی بھی آپ کو چھوڑنے کا تصور نہیں کر سکتی۔”
اس کو خود بھی یقین نہیں آ رہا تھا ۔ عاشر کا یوں واپس چلے آنا اور اس سے معافی مانگنا اسے حیرت میں مبتلا کر رہا تھا۔ اس سے پہلے کہ عاشر مزید نادم ہوتا اور عشنا سے ایسی کوئی بات کرتا وہ فوراً سے بول اُٹھی۔
“اب ہمیں اپنی زندگی کو نئے سِرے سے شروع کرنا چاہیے۔ پرانی ساری باتوں اور تلخیوں کو بھلا کر اپنی زندگی کی نئی شروعات کرنی چاہیے۔”
عاشر عشنا کی بات سن کر مسکرانے لگا۔ عشنا کے گلابی رخساروں پر جو چند آنسو ٹوٹے موتیوں کی طرح بکھرے ہوئے تھے انہیں عاشر نے اپنے ہاتھوں کی انگلیوں میں جذب کر لیا۔
“عشنا! اب کبھی بھی میں تمہاری ان کانچ جیسی سرمئی آنکھوں میں آنسو نہیں آنے دوں گا۔”
عاشر کی بات سن کر وہ مسکرانے لگی۔ اسے یقین ہی نہیں آ رہا تھا کہ اس کی دعا قبول ہو گئی ہے۔ خدا نے ایک ہی پل میں اس کے دامن کو خوشیوں سے بھر دیا تھا۔ وہ ساری بےچینی، بےسکونی کا بوجھ چند ہی لمحوں میں اس کی روح سے اتر گیا تھا۔ وہ خود کو بےحد ہلکا اور پُرسکون محسوس کر رہی تھی۔ آج اسے احساس ہوا تھا کہ انسان کو اپنی اوقات سے بڑھ کر مادیت پرستی کا مظاہرہ کرتے ہوئے کسی بھی ایسی چیز کی خواہش نہیں کرنی چاہیے جو اس کے لیے نقصان دہ ثابت ہو اور اگر کوئی انسان ایسا کرتا ہے تو اسے اپنے دل میں اتنی وسعت پیدا کرنی چاہیے کہ وہ اس راستے میں حائل ہر رکاوٹ، ہر پریشانی اور ہر آزمائش کا مقابلہ ہمت و حوصلے کے ساتھ کر سکے۔ کیونکہ جہاں پر انسان کی عقل کام کرنا چھوڑ دیتی ہے وہیں وہ ذات جو تمام مخلوقات کا خالق ہے وہ اس انسان کے لیے کوئی نہ کوئی وسیلہ بنا دیتی ہے۔
لہذا ہمیں بھی جھک کر اللہ تعالیٰ کے سامنے گِرگِرا کر معافی مانگنی چاہیے۔ کیونکہ اگر وہ قہاروجبار ہے تو وہیں وہ رحیم و کریم بھی ہے۔ جو ہمیں کوئی نہیں دے سکتا وہ صرف ہمیں خدا کی ذات ہی بخش سکتی ہے۔
؎ وہ ایک سجدہ جسے تُو گِراں سمجھتا ہے
ہزار سجدوں سے دیتا ہے آدمی کو نجات
—————————————————————
————————————————————
لب سے جو نکلی دعا تحریر حناء شاہد
Summary
