مکمل ناول:
اڑان۔۔۔۔۔!!!
تحریر
حناء شاہد
مکمل ناول
اڑان۔۔۔۔۔۔۔!!!
تحریر
حناء شاہد
قسط نمبر 2:
چھوٹے منڈیروں کے گھروں میں رہنے والے لوگ باہر سڑک پر سفر کرنے والوں کے لیے باعثِ فرحت بنتے ہیں۔ کسی کے گھر میں ساس بہو کا جھگڑا ہو رہا تھا اور کسی گھر میں بچے بھوک سے بلک رہے تھے۔ اور بےچاری ماں انہیں دلاسے دے دے کر لوری سنا رہی تھی۔ کہ رات کو ابا آئیں گے تو کھانے کے لیے آٹا ضرور لے کر آئیں گے۔ زندگی واقعی امید کے سہاروں چلتی ہے۔ فاطمہ بھی خود کو دلاسہ دے رہی تھی اور دل ہی دل میں سوچ رہی تھی کہ نجانے آج گھر میں روٹی بنانے کے لیے آٹا ہو گا یا نہیں۔ وہ خود سے خود ہی سوال کرنے میں مشغول تھی۔ اس کے گھر کے دروازے پر لوگوں کا ایک ہجوم اکٹھا تھا۔ کچھ لوگ تو منڈیروں پر چڑھ کر اندر جھانکنے کی کوشش کر رہے تھے اور کچھ نے تو حد ہی کر دی دروازے کے ساتھ لپٹ کر اندر جھانکنے کی باقاعدہ کوشش شروع کی۔
فاطمہ نے دور سے یہ منظر دیکھا تو اس کا دل دہل گیا اس کے دل میں بےچینی بڑھ گئی اور وہ لوگوں کے ہجوم کو دھیکلتے ہوئے گھر کے اندر داخل ہوئی۔ اس کا باپ احمد نشے سے ٹوٹتے ہوئے بدن کی درد برداشت نہ کرتے ہوئے آج پھر اس کی ماں کو مار پیٹ رہا تھا اور سارا زمانہ بجائے اس کے کہ اس کی ماں کو بچانے کے لیے اندر آتا سب کے سب تماشا دیکھنے میں مشغول تھے۔
“پیسے دے دے فاطمہ کی ماں۔۔۔۔۔۔!!! ورنہ! آج یا تو تُو زندہ رہے گی یا پھر میں۔”
احمد غصے سے اپنے کانپتے ہوئے ہاتھوں سے اپنے کندھے دبانے لگا اور چیخا۔
“نہیں دوں گی چاہے تُو مجھے مار دے۔۔۔۔۔! فاطمہ نے دن رات محنت کر کے ثانیہ اور رمشا کی فیس کے لیے پیسے جمع کیے ہیں اور میں تجھے آسانی سے کیسے دے دوں۔۔۔۔۔۔؟ تاکہ تُو وہ سارے پیسے لے جا کر اپنی عیاشی میں خرچ کر دے۔”
فاطمہ کی ماں اپنا دوپٹہ سنبھالتے ہوئے حوصلہ جمع کرتے ہوئے بولی۔
“میں عیاش ہوں۔۔۔۔۔؟ میں نہیں بلکہ تم تینوں ماں بیٹیاں عیاش ہو۔۔۔۔۔! میری تو قسمت خراب تھی۔ جو تجھ جیسی بدبخت منحوس سے شادی کر لی۔ تُو مجھے بیٹا تو دے نہیں سکی۔۔۔۔۔۔اور تین بیٹیاں پیدا کر کے مجھے زمانے بھر میں رسوا کر دیا ہے۔”
فاطمہ کی ماں کی باتیں سن کر احمد غصے سے تلملا اٹھا اور زور زور سے چیخنے لگا۔ جس پر فاطمہ کی ماں بھی سر پکڑ کر بیٹھ گئی اور زاروقطار رونے لگی۔
“قسمت تو میری خراب تھی۔۔۔۔۔!!!”
فاطمہ کی ماں روتے روتے کچھ بولتے بولتے چُپ کر گئی اتنے میں فاطمہ دروازہ کھول کر اندر آئی۔ دالان میں داخل ہوئی تو احمد اسے دیکھ کر مزید غصہ میں آ گیا اور تمسخر آمیز انداز میں بولا۔
“لو آ گئی ہیں میڈم صاحبہ۔۔۔۔۔! دن بھر آوارہ گردی کر کے۔۔۔۔۔۔۔۔!”
ان کے لہجے میں تنفر اس قدر تھا کہ فاطمہ کا دل بری طرح دکھا۔ مگر آج وہ ضبط کا پیمانہ توڑ کر بولی۔
“امی! آج پھر تماشا لگایا ہوا ہے آپ سب نے گھر میں۔۔۔۔۔۔؟؟؟”
فاطمہ کے لہجے میں بیزاری حددرجہ تھی۔ وہ روز روز کے اس تماشے سے اب تنگ آ گئی تھی۔
“کیا مطلب ہے تمہارا۔۔۔۔۔۔؟ تماشا لگاتا ہوں میں۔۔۔۔۔۔؟ یہ میرا گھر ہے۔۔۔۔۔ میں جب چاہوں آؤں ، جب چاہوں جاؤں۔۔۔۔۔۔۔۔! جھگڑا کروں یا خوش رہوں۔۔۔۔۔ بس اس گھر میں میری مرضی چلے گی۔ اور تم ہوتی کون ہو مجھ سے سوال کرنے والی۔۔۔۔۔۔؟؟؟”
نشے سے ٹوٹتے بدن کو دونوں ہاتھوں سے جلدی جلدی میں دباتے ہوئے لڑکھڑاتے قدموں کے ساتھ وہ بول رہا تھا۔ فاطمہ سے سوال کر رہا تھا۔
“ابا۔۔۔۔۔! آپ بیٹھیں، میں آپ کے لیے کچھ کھانے کو لاتی ہوں۔۔۔۔۔۔!”
احمد کی ایسی حالت دیکھ کر فاطمہ کو ایکدم ہی اس پر ترس آ گیا اور وہ اپنی کتابیں اور بیگ قریب ہی پڑی چارپائی پو رکھتے ہوئے بولی اور احمد کو بازو سے پکڑتے ہوئے بٹھانے کی کوشش کرنے لگی۔ جبکہ احمد نے فوراً سے اس کا ہاتھ جھٹک دیا اور تھوڑے فاصلے پر جا کر کھڑا ہو گیا۔ اور اپنے ہاتھوں کی انگلیوں کو منہ میں دانتوں کے نیچے دے کر زور زور سے دبانے لگا۔
“فاطمہ! مجھے پیسے چاہئیں۔۔۔۔۔۔!”
وہ ایکدم سے چلایا۔ فاطمہ کا سارا وجود لرز کر رہ گیا۔ اماں نے سر اٹھا کر احمد کی طرف دیکھا۔ اور پھر فاطمہ کی طرف۔
“وہ ابا! میں نے۔۔۔۔۔۔۔ثانیہ ۔۔۔۔ثانیہ۔۔۔۔۔!!!”
فاطمہ کی آواز میں کپکپاہٹ آ گئی۔ پھر وہ اپنے حواس پر قابو پاتے ہوئے کمرے کی طرف گئی اور کچھ لمحوں کے توقف کے بعد وہ باہر آئی تو اس کے ہاتھوں میں چند نوٹ تھے۔ اس کے ہاتھوں میں پیسے دیکھ کر احمد کے چہرے پر طمانیت آ گئی۔
“ابا۔۔۔۔! بس اتنے ہی پیسے تھے ابھی میرے پاس۔۔۔۔۔۔!”
پیسے احمد کے ہاتھوں میں دیتے ہوئے وہ جرات سے بولی۔ احمد نے فوراً سے اس کے ہاتھوں سے پیسے لے لیے۔ اور پیسے پکڑتے ہی وہ خوشی سے بولا۔
“ٹھیک ہے ابھی اتنے ہی بہت ہیں اگر ضرورت ہو گی تو مزید لے لوں گی۔ آخر میرا اپنا گھر ہے اور اس گھر کی ہر چیز میری ہے۔”
احمد منہ میں بڑبڑاتا ہوا گھر سے باہر نکل گیا۔
“فاطمہ! کیوں دیے تُو نے پیسے۔۔۔۔۔۔۔؟ دن رات محنت کر کے تُو پیسے اکٹھے کرتی ہے اور اب اپنے ابا کو اتنی آسانی سے دے دیے۔۔۔۔!”
اماں سر پر ہاتھ رکھتے ہوئے روتے روتے بولیں۔
“امی! آپ فکر کیوں کرتی ہیں۔۔۔۔۔۔؟ سب ٹھیک ہو جائے گا۔ میں رمشا اور ثانیہ کو دیکھتی ہوں۔”
یہ کہتے ہوئے فاطمہ اپنی چیزیں اٹھائے کمرے میں چلی گئی۔ جب وہ کمرے میں داخل ہوئی تو رمشا اور ثانیہ بھاگتے بھاگتے آئیں اور فاطمہ کے ساتھ لپٹ کردونوں نےرونا شروع کر دیا۔
“باجی! ہمارے ابو بہت برے ہیں۔”
رمشا روتے روتے بولی۔
“بری بات ہے رمشا۔۔۔۔۔۔! ایسا نہیں کہتے۔”
فاطمہ نے اسے ڈپٹا۔
“باجی! ابو نے امی کو پھر مارا ہے۔ سب کے ابو ان سے بہت پیار کرتے ہیں۔ مگر ہمارے ابو تو ہر وقت ہمیں ڈانتے رہتے ہیں۔۔۔۔۔گھر بھی نہیں آتے اور اگر آ جائیں تو امی کے ساتھ اور آپ کے ساتھ جھگڑا کرتے ہیں۔ ہمیں پیسے دینے کی بجائے ہمارے پاس جو پیسے ہوتے ہیں وہ بھی چھین کے لے جاتے ہیں۔ مجھے ابا سے بہت ڈر لگتا ہے۔”
سسکیاں لیتے ہوئے ثانیہ نے زاروقطار رونا شروع کر دیا۔
“پہلے تم دونوں اپنے آنسو صاف کرو۔۔۔۔۔! تمہیں نڈر بننا ہے۔ اگر تم دونوں ایسے چھوٹی چھوٹی بات پر رونے لگ گئی تو میری بھی ہمت ٹوٹ جائے گی۔ ہمیں ایک دوسرے کا سہارا بننا ہے اور بہت آگے جانا ہے۔ اپنی تعلیم کی طرف دھیان دو۔ ہمیں اپنی ماں کے بازو بننا ہے۔ سر اُٹھا کے جینے کے لیے ہمت اور حوصلے کی ضرورت ہوتی ہے۔ آئندہ کبھی اس طرح رونے کی اور ڈرنے کی ضرورت نہیں ہے۔ اب تم دونوں بیٹھ کے پڑھائی کرو۔ میں اپنی چیزیں سمیٹ کر آتی ہوں۔”
فاطمہ انہیں اچھے سے سمجھاتے ہوئے ان کے آنسو پونچھتے ہوئے انہیں ان کی زندگی کا اصل مقصد یاد دلا رہی تھی۔ اور وہ دونوں بھی سمجھداری کا ثبوت دیتے ہوئے فاطمہ کی ایک ایک بات کو اچھے سے سمجھ رہی تھیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(جاری ہے)
