“زندگی میں سب کچھ پیسہ ہی ہوتا ہے۔۔۔۔۔! اگر آپ کے پاس پیسہ ہے تو سب لوگ آپ کی عزت کرتے ہیں اور اگر آپ غریب ہو تو لوگ آپ کی مدد کرنا تو دور کی بات ہے آپ کی طرف دیکھنا بھی پسند نہیں کرتے۔” انور نے حقارت سے کہا تو اس کے برابر بیٹھا اس کا دوست اس کی ہاں میں ہاں ملاتے ہوئے بولا۔ “ہاں! یار تم ٹھیک ہی کہہ رہے ہو۔” وہ اس کی بات سے متفق ہوتے ہوئے قدے توقف سے پھر بولنے لگا۔ “اب میرے حالات بھی تمہارے سامنے ہیں۔ابا بیمار ہیں اور اماں۔۔۔۔۔۔۔! وہ کپڑے سلائی کر کے گھر کا نظام چلا رہی ہیں۔کل میں چچا کے پاس گیا تھا۔ابا کے لیے دوائیوں کے پیسے مانگنے۔۔۔۔۔مگر انہوں نے مجھے دیکھ کر اپنے گھر کا دروازہ بند کر دیا۔” انور کا دوست علی تاسف بھرے لہجے میں سب بیان کر رہا تھا۔ تبھی انور فوراً سے بولا۔ “تو پھر کیا تم نے اپنے ابا کی دوائیاں نہیں خریدیں۔۔۔۔۔۔۔؟؟؟” انور کا انداز استفہامیہ تھا۔ “ابا کی دوائی خریدنا تو دور کی بات ہے۔ ابھی تو بجلی اور گیس کا بل بھی ادا کرنا ہے۔ مگر گھر میں چولہا گلانے کے لیے پیسے نہیں ہیں اور بل کے لیے پیسے کہاں سے آئیں گے۔۔۔۔۔۔؟؟؟” علی رنجیدہ لب و لہجے کے ساتھ اپنے گھر کے حالات بیان کر رہا تھا۔ جس پر انور بھی تاسف کی کیفیت میں مبتلا ہو گیا۔ اس کے گھر کے حالات بھی تو کچھ ایسے ہی تھے۔
“انسان”، انس کی جمع ہے۔ “انس” کا مطلب ہے “محبت و خلوص کا پیکر”۔ انسان جسے اشراف لمخلوقات کہا گیا ہے۔ جسے تمام فرشتوں نے سجدہ کیا۔اس خاکی پُتلے کو اتنا مقام عطا کیا گیا۔ اسے اتنی فضیلت عطا کی گئی ہے۔ اسے عقل و دانش عطا کی گئی ہے۔ مگر جب یہی انسان اپنی انا کے بھنور اور سائے کے پیچھے چلتا ہے تو وہ ماں، باپ، چھوٹے بڑے، بہن بھائی ہر قسم کے رشتے کی تمیز کھو بیٹھتا ہے۔ دولت کی ہوس میں انسانیت سے حیوانیت میں قدم رکھ لیتا ہے اور انسانی قدروں کو پامال کرنے سے بھی گریز نہیں کرتا ہے۔ دنیا کی ساری نعمتیں ہونے کے باوجود بھی وہ عجیب قسم کی بےچینی میں مبتلا رہتا ہے اور سمجھ نہیں پاتا کہ اسے کیا چاہئیے اور کیا نہیں۔۔۔۔۔؟؟؟
انور اپنی ماں کا اکلوتا بیٹا تھا۔ اس کے والد کا انتقال ہو گیا تھا۔ جبکہ اس کی ماں لوگوں کے گھروں میں کام کرتی تھی۔ اس طرح انور کے گھر کا نظام چل رہا تھا۔ انور کی ماں کی بڑی خواہش تھی کہ اس کا بیٹا انور پڑھ لکھ کر بڑا افسر بنے۔ انور گریجوایشن کر رہا تھا۔ لیکن! اسے پڑھائی سے کوئی خاص لگاؤ نہیں تھا۔ وہ گریجوایشن بھی اپنی ماں کی ضد پر ہی کر رہا تھا۔جیسے ہی اس کے امتحانات ختم ہوئے وہ سارا سارا دن اپنے آوارہ دوستوں کے ساتھ گھومنے پھرنے لگا۔ انور کی ماں نے اسے بہت سمجھایا۔ مگر وہ کسی بات کو سمجھتا ہی نہ تھا۔ اسے اپنی بوڑھی ماں کا بھی خیال نہ تھا۔ اس طرح دن گزرتے گئے اور رات کو دیر سے گھر آنا انور نے اپنا معمول بنا لیا۔ انور کی بوڑھی ماں کو ہر وقت اپنے نالائق بیٹے کی فکر رہنے لگی۔ مگر انور تھا کہ اسے کسی بھی چیز کی پروا نہ تھی۔
“اسی طرح میں بھی ایک دن بڑی سی گاڑی میں گھوموں پھروں گا۔۔۔۔۔!” انور نے اشتیاق آمیز انداز میں قریب سے گزرتی ہوئی گاڑی کو دیکھ کر مسکراتے ہوئے کہا۔ تو اس کے سارے دوست ہنسنے لگے۔ وہ چاروں دوست سڑکے کے ایک کونے پر ہجوم بنا کر کھڑے تھے تبھی اس کا دوست بولا۔ “انور یار۔۔۔۔۔! تُو اور وہ بھی گاڑی میں۔۔۔۔۔۔۔؟؟؟” اس کے ایک دوست نے ہاتھ سے اشارہ کرتے ہوئے استہزائیہ انداز میں کہا تو انور کو غصہ آ گیا۔ اس سے پہلے کہ وہ کچھ بولتا اس کا ایک دوسرا دوست اس کا مذاق اڑاتے ہوئے گویا ہوا۔ “انور! انسان کا خواب اپنے قد کے برابر دیکھنے چاہئیں۔ گاڑی میں بیٹھنا تو بہت دور کی بات ہے۔ اگر تُو ساری زندگی بھی پیسے جمع کرتا رہے تب بھی تُو ایسی شاندار گاڑی نہیں خرید سکتا۔۔۔۔۔۔” اس کے سبھی دوست اس کا مذاق اڑا رہے تھے تو انور طیش کے عالم میں آگے بڑھا اور اپنے دوست کا گریبان پکڑتے ہوئے غصے سے دھارا۔ “میں ایسی گاڑی خریدوں گا بھی اور اس میں بیٹھوں گا بھی۔ مجھے امیر ہونا ہے اور بہت ساری دولت جمع کرنی ہے اور پیسے اکٹھے کرنے کے لیے مجھے کسی کی جان بھی لینی پڑی تو میں اس سے بھی دریغ نہیں کروں گا۔” انور کی آنکھوں میں سرخ ڈورے بلکورے مار رہے تھے۔ وہ طیش کے عالم میں یہ بھی بھول بیٹھا کہ جس دوست کا وہ گریبان پکڑے کھڑا ہے اس کا سانس بند ہونے والا تھا۔سب دوست اس کو چھوڑنے کی کوشش کر رہے تھے۔ بالآخر انور نے اس کا گریبان چھوڑ دیا اور غصے کے عالم میں وہاں سے چلا گیا۔
وقت اور حالت کو بدلنے کی خواہش میں انور نے سیدھا اور غلط سوچنے کی بجائے ایسا راستہ اختیار کیا جس پر اگر انسان ایک بار قدم رکھ لے تو پھر کبھی اس کی واپسی ممکن نہیں ہوتی۔۔۔۔۔۔۔!!! انور نے اپنے دوست علی کو اپنے ساتھ ملایا اور دونوں نے اپنے حالات بدلنے کی خواہش میں غلط راستے کا انتخاب کر لیا۔ سب سے پہلے ان دونوں نے بازار سے جا کر ایک نقلی پستول خریدی۔ جس کو دیکھ کر ذرا سا بھی گمان نہ ہوتا تھا کہ یہ نقلی ہے۔ پھر وہ دونوں رات کے اندھیرے میں کسی سنسان جگہ پر جا کر چھپ جاتے اور ہر آنے جانے والے کو وقتاً فوقتاً گن پوائنٹ پر لوٹنے لگے۔ لوٹ مار سے حاصل ہونے والی چیزوں سے ان دونوں کا جو بھی حصہ بنتا وہ آپس میں بانٹ لیتے ۔ انور کو کسی قسم کی کوئی پشیمانی اور شرمندگی محسوس نہ ہوتی۔ لیکن علی بہت ڈرپوک تھا۔ اسے کبھی پولیس کا ڈر، کبھی اماں ابا کو پتہ چل جانے کا خوف، محلے والوں کا ڈر اسے بار بار احساس دلاتا کہ وہ غلط کررہا ہے۔ مگر ہر بار انور اسے سمجھا کر اپنے ساتھ لے جاتا۔ انور نے گھر جانا بھی چھوڑ دیا تھا۔ وہ غلط کاموں میں اس قدر مگن تھا کہ اسے اپنی بوڑھی ماں کا بھی خیال نہ تھا۔ انور جس جگہ رہتا تھا وہاں آس پڑوس اور محلے کے لوگ کافی عرصے سے انور کو جانتے تھے۔ انور کے یوں گھر چھوڑ کر چلے جانے کے بعد محلے والوں نے اس کی بوڑھی ماں کا خیال رکھنا شروع کر دیا۔ محلے والے تین وقت کا کھانا اس بوڑھی عورت کو دے جاتے اور اس کی ہر ضرورت کا خیال رکھتے۔ لیکن وہ ایک ماں تھی۔ بیٹے کی جدائی نے اس کے دل کو روگ لگا دیا تھا۔ وہ ہر وقت اپنے بیٹے کی جدائی میں آنسو بہاتی رہتی۔
آج علی اور انور ارادہ کر کے آئے تھے کہ وہ کسی بائیک والے کو نشانہ نہیں بنائیں گے بلکہ آج وہ کسی گاڑی والے کو لوٹیں گے۔ اسی انتظار میں وہ رات کے بارہ بجے ایک سنسان سڑک پر ایک درخت کے پیچھے چھپے ہوئے تھے کہ اچانک دور سے ایک سفید گاڑی آتی ہوئی دکھائی دی۔ انور کے چہرے پر مسرت کے سائے منڈلانے لگے۔ اس نے مسکرا کر علی کی طرف دیکھا۔ مگر علی کی آنکھیں خوفزدہ تھیں۔ دھیرے دھیرے گاڑی قریب آئی تو انور نے علی کا ہاتھ مضبوطی سے تھامتے ہوئے گاڑی کے سامنے آ کر رک گیا۔ ان دونوں نے گن کو زور سے پکڑ رکھا تھا۔ گاڑی کچھ فاصلے پر روک دی گئی۔ گاڑی میں دو افراد سوار تھے۔ فرنٹ سیٹ پر شاید ڈرائیور بیٹھا تھا اور بیک سیٹ پر مالک براجمان تھا۔ انور نے بیک گاڑی کا دروازہ کھلوایا تو بیک سیٹ والا آدمی استہزائیہ مسکرانے لگا۔ انور کو پہلے تو کچھ سمجھ نہیں آیا کہ وہ آدمی ڈرنے کی بجائے مسکرا کیوں رہا ہے۔۔۔۔۔۔؟ پھر وہ پُراعتماد انداز میں بولا۔ “تمہارے پاس جو کچھ ہے وہ مجھے خاموشی سے دے دو۔ ورنہ میں تم دونوں کو گولی مار دوں گا۔” انور کے ہاتھ کانپ رہے تھے۔ پھر اس آدمی نے ہاتھ بڑھا کر بڑی چالاکی کے ساتھ زور سے انور کے ہاتھ سے پستول چھین لی۔ آج پہلی بار انور کے چہرے پر خوف کے سائے منڈلائے تھے۔ وہ اسسب سے خوفزدہ ہو گیا تھا۔ کیونکہ ایسا آج پہلی بار جو ہوا تھا۔ “لڑکے۔۔۔۔۔! تم کیا سمجھتے ہو۔۔۔۔۔؟ میں تمہاری اس نقلی پستول سے ڈر جاؤں گا اور اپنا ساراسامان تمہیں دے دوں گا۔۔۔۔۔۔؟؟؟” اس آدمی کا اندازاستفہامیہ تھا۔ جس پر انور مزید خوفزدہ ہو گیا۔ پھر اس آدمی نے ایک زوردار قہقہہ لگایا اور قدرے توقف سے اپنی ہنسی پر قابو پاتے ہوئے بولا۔ “میں تمہارے جیسے چیلوں کا بادشاہ ہوں۔۔۔۔۔میرا ہاتھ تھامو اور میرے گینگ میں شامل ہو جاؤ۔” اس آدمی نے اپنا داہنا ہاتھ آگے بڑھایا اور اسے ہاتھ تھامنے کا بولا تو انور اور علی نے حیرت سے ایک دوسرے کی طرف دیکھا۔ انہیں کچھ سمجھ نہیں آ رہا تھا۔ “میرے گینگ کے لوگ یہ چھوٹے چھوٹے کام نہیں کرتے۔ بلکہ وہ بڑے بڑے کام کرتے ہیں اور ایک کام کے انہیں اتنے پیسے مل جاتے ہیں کہ وہ اپنی ساری زندگی بڑی آسانی سے گزار سکتے ہیں۔” وہ آدمی غرور سے شانے اچکائے اپنے بارے میں اور اپنے گینگ کے بارے میں بتا رہا تھا۔ انور مسحور کُن انداز میں اس آدمی کی طرف دیکھ رہا تھا۔اسے یوں لگا جیسے اس کی منزل اس کے سامنے کھڑی ہے۔ “اگر تم لوگ حصولِ دولت کے لیے کوشاں ہو تو جس طرح کے کام تم کرتے ہو۔ اس سے تم لوگ کبھی بھی امیر نہیں ہو سکتے۔” انور اس آدمی کی باتوں سے بےحد متاثر ہو رہا تھا اور اس نے فوراً سے اس آدمی کے گینگ میں شامل ہونے کا ارادہ کر لیا اور یہ پوچھنا بھی گوارا نہ کیا کہ وہ کیا کام کرتا ہے۔۔۔۔۔؟ علی کو وہ آدمی اور اس کا گینگ ٹھیک نہیں لگ رہا تھا۔ اس نے انور کو سمجھانا چاہا۔ “انور یار۔۔۔۔! مجھے یہ بندہ ٹھیک ٹھیک نہیںلگ رہا۔ چل یہں سے چلتے ہیں۔” لی نے اس کا ہاتھ پکڑا اور اسے سمجھاتے ہوئے وہاں سے لے جانے کی کوشش کی۔ مگر انور نے فوراً سے اس کا ہاتھ جھٹک دیااور بولا۔ “مجھے صرف دولت چاہئیے۔۔۔۔۔خواہ اس کے لیے مجھے چھ بھی کرنا پڑے۔ میں نے فیصلہ کر لیا۔ میں آدمی کے ساتھ جا رہا ہوں۔ اگر تم نے بھی چلنا ہے تو چلو۔۔۔۔۔! زندگی سنور جائے گی تمہاری اور تمہارے گھر والوں کی۔۔۔۔۔” انور نے پُراعتماد لہجے میں اسے حالات کے بدلنے کی نوید نائی تو وہ غصے سے بول “ایسے غلط کام کر کے حالا بدلنے سے بہتر ہے میں غریب ہی رہوں۔ عزت اور شرافت کی دوروٹی کھانے سےسکون کی نیند آتی ہے اور برے کام کرنے سے انسان کو ایک پل بی سکون نہیں ملتا۔ سکون سے سونا تو بہت دور کی بات ہے۔ علی اسے سمجھانے کی کوشش کر رہا تھا۔ مگر انور نے فیصلہ کر لیا تھا۔اس لیے اس نے کرخت انداز میں جواب دیا۔ “ٹھیک ہے۔۔۔۔۔۔! پھر میں چلتا ہوں ۔ تم رہو غربت کی اس دلدل میں۔۔۔۔۔۔! میں جلد امیر بن کر واپس آؤں گا۔” انور نے ہنستے ہوئے پُراعتماد انداز اپنایا تو علی کو اس کی سوچ پر افسوس ہونے لگا۔ علی حیران پریشان تھا۔ لیکن انور وہ ہر چیز سے لاپروا ہو کر اس آدمی کے ساتھ گاڑی میں بیٹھ کر چلا گیا۔
انور کی ماں دن بدن اس کی جدائی کے غم میں رورو کر شدید بیمار ہو گئی۔ جب محلے والوں نے اسے شدید بیمار دیکھا تو اسے مقامی سرکاری ہسپتال میں داخل کروا دیا۔ جبکہ انور دولت کی دھن میں اس قدر گُم تھا کہ اپنی ماں کو بھول گیا۔ انور کو جلد اپنے حصے کا کام مل گیا۔ بھرے بازار میں فائرنگ کرنا یا پھر کسی مارکیٹ میں دھماکہ کر دینا وغیرہ۔۔۔۔۔۔۔! وہ یہ بھول گیا تھا کہ وہ دولت کے حصول میں کتنے بےگناہ لوغوں کا قتلِ عام کر رہا ہے۔ وہ دولت کی ہوس میں پاگل ہو گیا تھا۔ جبکہ انور کے گینگ کا آنر اس سے بےحد خوش تھا۔ کیونکہ انور کو جو بھی کام دیا جاتا۔ وہ بغیر کوئی سوال پوچھے ہر کام کرنے لگ جاتا۔ وہ یہ سارے غلط کام خوشی خوشی کر رہا تھا اور خوشی سے کیوں نہ کرتا۔۔۔۔۔۔؟؟؟ ان سارے کاموں کے عوض اسے اچھا خاصا معاوضہ مل رہا تھا۔
وقت بھی بڑی عجیب چیز ہے۔۔۔۔۔۔۔۔۔!!! ماضی میں جو بھی اچھے یا برے عمل کا بیج ہم بوتے ہیں۔ حال یا مستقبل میں ہمیں وہ فصل کاٹنی ہی پڑتی ہے۔ انور کو آج پہلی بارگینگ کے آنر کے ہیڈ آفس میں بلایا گیا تھا۔ تو وہ بھی پورے وقت پہ آفس پہنچ گیا اور کچھ ہی دیر میں وہ اس آدمی کے سامنے بیٹھا تھا جو اس سارے گینگ کا آنر تھا۔ “جی سر۔۔۔۔۔! آپ نے مجھے بلایا تھا۔۔۔۔۔۔؟؟؟” انور نے حیرت سے پوچھا۔ “ہاں! تم سے ایک ضروری بات کرنی ہے۔” اس آدمی نے رعبدار آواز میں کہا۔ “یہ ٹیبل پر تمہارا دبئی کا ٹکٹ اور ویزا پڑا ہے۔” اس آدمی نے ہاتھ سے ٹیبل پر رکھے ان دونوں لفافوں کی طرف اشارہ کیا۔ “کل شام تمہیں ایک اہم کام کرنا ہے۔ ایک سرکاری ہسپتال میں بم بلاسٹ کرنا ہے اور اگر یہ کام تم نے صحیح طرح سے کر دیا تو ٹھیک چار دن کے بعد صبح پانچ بجے کی تمہاری فلائٹ ہو گی اور پھر تم ہمیشہ کے لیے دبئی میں رہو گے۔ عیش کرو گے اور اگلا ٹارگٹ تمہیں دبئی میں دیا جائے گا۔” آنر نے تفصیلات بتاتے ہوئے سارا لائحہ عمل پیش کیا تو انور نے انتہائی سنجیدہ انداز میں اگلی بات کہی۔ “ٹھیک ہے۔۔۔۔۔! مجھے کوئی اعتراض نہیں ہے۔ مگر دبئی جانے سے پہلے ، میں اپنی ماں سے ضرور ملنا چاہوں گا۔ اور ان سارے محلے والوں سے بھی ایک بار ضرور ملنا چاہوں گا۔ جنہوں نے ہر وقت میری ناک میں دم کر رکھا تھا۔ چوبیس گھنٹے مجھے ایک ہی طعنہ دیتے تھے کہ پڑھو لکھو، تعلیم کے بغیر کوئی انسان دولت مند نہیں بن سکتا۔ میں ان سے مل کر انہیں دکھانا چاہتا ہوں کہ تعلیم اور محنت کے بغیر بھی انسان دولت مند بن سکتا ہتے۔” یہ سب باتیں کہتے ہوئے انور کے چہرے پر ملال یا ندامت نہیں تھی بلکہ وہ بےحد خوش تھا۔ شاید اسے اپنی ماں سے ملنے کی خوشی تھی، یا دبئی جانے کی۔۔۔۔۔۔یا پھر اپنی اس خودساختہ سوچ کی فتح کی خوشی نے اس کا غرور سے اونچا کر دیا تھا اور وہ یہ سوچ رہا تھا کہ اس نے امیر بننے کے لیے صحیح یا غلط کی پروا کیے بغیر اپنی زندگی میں سب کچھ حاصل کر لیا تھا۔ جس کو پا لینے کا اس نے پُختہ عزم کیا تھا۔
اگی صبح مقررہ وقت پر انور اس ہسپتال کے مرکزی دروازے پر موجود تھا۔ جس کو گزشتہ شب اسے ٹارگٹ دیا گیا تھا۔ وہ بارود سے بھرا ہوا بیگ ہسپتال کے پچھلے گراؤنڈ میں مقررو جگہ پر رکھ کر چلا گیا۔ وہ ایک ٹائم بم تھا۔ جو وقت پورا ہونے پر بلاسٹ ہو جاتا تھا۔ وہ تقریباً آدھے گھنٹے میں اپنے اپارٹمنٹ میں پہنچ گیا۔ اس نے ٹیلی ویژن آن کیا۔تو ہر نیوز چینل پر ایک ہی نیوز چل رہی تھی۔ “لاہور میں ایک سرکاری ہسپتال میں بم بلاسٹ ہوا ہے۔” یہ سنتے ہی اس نے چینل چینج کر دیا۔ “لاہور کے سرکاری ہسپتال میں ہونے والے بم بلاسٹ کے نتیجے میں درجناں افراد ہلاک اور بہت سارے لوگ شدید زخمی ہوئے ہیں۔” انکرز گلا پھاڑپھاڑ کر تاسف بھرے لہجے میں چیخ رہے تھے۔ خون سے لتھڑی ہوئی لاشوں کو دیکھ کر ایک منٹ کے لیے تو انور کے دل میں چبھن محسوس ہوئی۔ “یہ میں نے کیا کیا ہے۔۔۔۔۔۔؟؟؟” وہ تاسف سے بولا۔ “ان میں سے بہت سے لوگ تو اپنے گھر کے سربراہ ہوں گے اور کچھ کفالت کرنے والے ہوں گے۔” انور کے دل میں ایک درد بھری ٹیس اٹھی۔ شاید وہ ضمیر کی آواز تھی۔ “میری ہوس نے کتنی ماؤں سے ان کے بیٹے، کتنی بہنوں سے ان کے بھائی اور کتنے ہی بچوں کو یتیم کر دیا ہے۔” اس کے ضمیر کی آواز چیخ چیخ کر اسے احساس دلا رہی تھی کہ اس نے بہت غلط کیا ہے۔ لیکن دوسرے ہی لمحے انور نے اپنے سر کو جھٹک دیا اور اس کی ہوس اس کے خیالوں اور ضمیر پر بھی سبقت لے گئی اور اس کے چہرے پر پھر مسکراہٹ آ گئی۔
صبح ہوتے ہی انور مارکیٹ گیا۔ وہاں سے کافی مہنگے کپڑے اپنی ماں کے لیے خریدے۔ ساتھ ہی بہت سارے تحفے محلے والوں کے لیے بھی خرید لیے۔ اس نے سوچ رکھا تھا وہ محلے والوں کا شکریہ صرف اس لی ادا کرے گا کیونکہ اس کے چلے جانے کے بعد انہوں نے اس کی ماں کا بہت خیال رکھا ہے۔ وہ اپنی ماں سے ملنے کے لیے بےتاب تھا۔ وہ جلدی سے گاڑی میں بیٹھا اور اندرونِ شہر لاہور میں اپنے آبائی گھر کی طرف روانہ ہوا۔ اس کے دل میں بار بار یہ خیال آ رہا تھا۔ “میں نے اماں کو بہت ستایا ہے۔ مگر اماں مجھ سے بےحد پیار بھی کرتی ہے۔ مجھے دیکھتے ہی وہ میری ساری غلطیوں کو معاف کر دے گی۔” وہ دل ہی دل میں سوچ رہا تھا۔ جب وہ اپنے گھر کے دروازے کے قریب پہنچا تو دیکھا کہ محلے کے سارے آدمی گھر کے دالان میں بیٹھے ہیں اور سورۃ یسین پڑھ رہے ہیں۔ وہ پریشان ہو گیا کہ یہ کیا ماجرا ہے۔۔۔۔۔۔؟؟؟ لیکن۔۔۔۔۔۔!!! جیسے ہی انور دروازے سے اندر داخل ہوا تو ایک آدمی نے یہ کہہ کر سب کی توجہ انور کی طرف مبذول کروائی کہ: “لو آ گیا ہےیہ بدبخت۔۔۔۔۔۔۔! بدنصیب۔۔۔۔۔۔! انور۔۔۔۔۔۔!!!” ایک آدمی نے فوراً حقارت سے اس کی طرف دیکھا اور پھر بولا۔ “اپنی ماں کے جنازے کو کندھا تو نہ دے سکا۔ اب کیا لینے آیا ہے یہ بدبخت۔۔۔۔۔۔؟؟؟” اس آدمی کا انداز استفہامیہ تھا۔ یہ سنتے ہی انور کا رنگ پھیکا پڑ گیا۔ اس کے قدموں تلے سے زمین جیسے نکل گئی ہو اور آسمان جیسے اس کے سر پر پھٹ پڑا ہو۔ اسے اپنے کانوں پر یقین نہیں آ رہا تھا۔ ایک لمحے کے لیے اسے لگا جیسے یہ سب لوگ اس کے ساتھ مذاق کر رہے ہیں۔ لہذا انور نے اس آدمی کے قریب جا کر اس کا گریبان پکڑتے ہوئے پوچھا۔ “تم لوگ جھوٹ بول رہے ہو۔۔۔۔۔۔!” آدمی کے گریبان پر اس کے ہاتھوں کی گرفت مضبوط تھی۔ “مجھے بتاؤ میری ماں کہاں ہے۔۔۔۔۔۔۔؟؟؟” پھر انور غصے سے چیخا۔ “ہوش کرو انور۔۔۔۔۔۔۔! یہ سچ ہے اماں کی طبیعت کچھ دنوں سے بہت زیادہ خراب تھی تو ہم سب محلے والوں نے انہیں سرکاری ہسپتال میں ایمرجنسی وارڈ میں داخل کروآئے۔۔۔۔۔۔!” یہ سنتے ہی انور کے دماغ کی شریانیں پھول گئیں۔ “اماں کی حالت بہت خراب تھی۔ ابھی ایک ہی رات انہیں ہسپتال میں ہوئی تھی کہ دوسرے دن شام کو ٹیلی ویژن پر خبر آئی کہ ہسپتال میں دھماکہ ہو گیا ہے۔۔۔۔۔۔” انور وہیں زمین میں دھنستا چلا گیا۔ “اور۔۔۔۔۔! اس دھماکے میں اماں جی کا انتقال ہو گیا ۔ بس اب اللہ تعالیٰ سے دعا ہے کہ اللہ انہیں جنت الفردوس میں اعلیٰ مقام عطا فرمائے۔” انور کے حواس خلاؤں میں کہیں گُم تھے۔ آہستہ آہستہ سب محلے والے اس کے کندھے پر ہاتھ رکھتے ہوئے اسے صبروہمت کی تلقین کرتے ہوئے جارہے تھے۔ پھر دھیرے دھیرے گھر کا دالان خالی ہو گیا۔ اور انور اکیلا رہ گیا۔ پھر آہستہ آہستہ اسے سب کچھ یاد آنے لگا۔
انور کو آج معلوم ہوا کہ جو کانٹے وہ دوسروں کے لیے بو رہا تھا۔ جب وہ کانٹے دوسرے لوگوں کو چبھتے تھے تو اسے بہت خوشی ہوتی تھی۔ اسے دلی سکون اور اطمینان ہوتا تھا۔ لیکن۔۔۔۔۔! اس نے تو یہ کبھی سوچا ہی نہیں تھا کہ ان کانٹوں کی چبھن جب اسے محسوس ہو گی تو اس کے جذبات کیا ہوں گے۔۔۔۔۔۔؟ “یہ کیا کیا میں نے۔۔۔۔۔۔۔۔۔۔؟ میں نے خود اپنے ہاتھوں سے اپنی ماں کو قتل کر دیا ہے۔” “میرے جیسا بھی کوئی بدبخت ہو گا۔ جس نے اپنی جنت کو خود آگ لگا دی ہو۔۔۔۔۔۔۔!” انور کی آنکھوں سے اشک رواں تھے۔ وہ گھٹنے زمین پر ٹکائے سوچوں کے سمندر میں غرق تھا۔ “میں نے تو ساری زندگی اپنی ماں کو کوئی خوشی نہیں دی۔” انسان بعض دفعہ یہ بات سمجھنے سے قاصر ہوتا ہے کہ دوسروں کی خوشیاں چھین کر اور ان کو کانٹے دے کر انسان اپنے لیے خوشیوں اور پھولوں کا تصور کس طرح کر سکتا ہے۔۔۔۔۔۔؟ کیونکہ اس وقت وہ خودغرض بن جاتا ہے۔۔۔۔! انور ندامت اور شرمندگی سے سرجھکائے سوچوں کے زاویے بُن رہا تھا۔ لیکن اب اس ندامت اور شرمندگی کا کیا فائدہ۔۔۔۔۔؟؟؟ “میری ہوس نے ہی مجھ سے میری ماں کو چھین لیا میں دولت حاصل کرنے کی ہوس میں اس قدر گر گیا کہ مجھے معلوم ہی نہ ہوا کہ میں نے کب اتنے سارے بےگناہ اور معصوم لوگوں کی جان لے لی۔۔۔۔۔۔” اس نے زور سے زمین پر اپنے ہاتھ مارے اور اپنا سر زمین پر ٹکاتے ہوئے زاروقطار رونے لگا۔ “آج جو دولت میرے پاس ہے کیا اس سے میں اپنی جنت، اپنی ماں کو واپس لا سکتا ہوں۔۔۔۔۔۔۔!” وہ زورزور سے چیخنے لگا۔ لیکن اس کے ضمیر پر بوجھ تھا۔ وہ اپنے ضمیر کی جھنجھلاہٹ سے چھٹکارا حاصل کرنا چاہتا تھا۔ اس کا ضمیر اسے ملامت کر رہا تھا اور اسی قید سے نجات پانے کے لیے وہ یکدم ہی کھڑا ہوا اور اسی کیفیت میں اس نے زورزور سے دیوار کے ساتھ اپنا سر مارنا شروع کر دیا۔ اس کا سر بری طرح زخمی ہو گیا تھا۔ اور انور اپنے ہوش و حواس کھو بیٹھا تھا۔ حتیٰ کہ ایک حد ایسی آئی کہ جب وہ اپنا ذہنی توازن کھو بیٹھا اور پاگلوں جیسی حرکتیں کرنے لگا۔ پھر اس نے دروازہ کھولا اور گلی میں پاگلوں کی طرح دوڑنے لگا۔ لوگ اسے دیکھ کر حیران تھے اور افسوس کر رہے تھے۔
چند ہفتوں بعد۔۔۔۔۔۔۔! “اماں۔۔۔۔۔۔! اماں۔۔۔۔۔۔۔! تُو کہاں ہے۔۔۔۔۔۔۔۔؟؟؟” “اماں۔۔۔۔۔۔! دیکھ۔۔۔۔۔۔! میں گاڑی لے کر آیا ہوں۔۔۔۔۔۔۔۔!” “چل اٹھ اماں۔۔۔۔۔۔! مجھے بھوک لگی ہے۔۔۔۔۔۔۔چل نا روٹی بنا دے۔۔۔۔۔۔!!!” ایسے ہی ٹوٹے پھوٹے الفاظ گویا کرتا ہوا انور کچرے کے ڈھیڑ پر اس حالت میں بیٹھا تھا کہ اس کے بال بکھرے ہوئے تھے اور کپڑے بھی پھٹے ہوئے تھے۔ گلی محلے کے بچے اسے تنگ کرتے تو وہ گلیوں میں بھاگتا پھرتا۔۔۔۔۔۔! انسان اشرف لمخلوقات ہے۔۔۔۔۔۔۔! اسے صحیح اور غلط کی سمجھ عطا کی گئی ہے۔ اپنی عقل کو استعمال کرتے ہوئے ہمیشہ صحیح راستہ منتخب کرنے کا اختیار انسان کو حاصل ہے۔ ورنہ۔۔۔۔۔۔!!! کچھ راستے ایسے ہوتے ہیں۔ جن پر چل کر اگر انسان واپس آنا چاہے تو پھر کبھی اس کی واپسی ممکن نہیں ہوتی۔۔۔۔۔۔۔۔۔۔!!!
